本文重點
尋日香港確診第三宗豬流感（H1N1甲型流感）個案，雖然呢宗係喺美國入口，唔係本地爆發，但畢竟香港同外地接觸頻繁，睇見日本喺社區爆發豬流感，疫情不斷擴散，都咪話唔驚。○三年沙士嘅陰影揮之不去，日日提心吊膽，但偏偏有啲人就好似天塌落嚟都當被冚咁。
尋日沙田馬場有賽事，馬會各大董梗係入場坐鎮啦，當中包括李國棟。李大董係家庭醫學專科醫生，應該好留意豬流感嘅疫情，點知一問之下真係嚇你一驚。
李大董嘅囝囝喺美國讀書，問起囝囝有冇受豬流感影響，佢好淡定咁回應話未驚過。若果大家以為可能因為佢係醫生，所以想派定心丸，以免引起社會恐慌，先至用咁肯定口脗講嘢嘅話，咁就估錯晒嘞！
點解？係佢對中國人嘅體質有特別見解。李大董話，中國人對豬病毒嘅免疫力應該幾強，皆因大家無豬不歡，對食豬亦訓練有素，莫講話食豬肉，連豬腸、豬肝、豬肺、豬脷同豬腦都照單全收，吞晒落肚，食得豬多，早已對豬病毒產生抗體喎，區區一場豬流感，又使乜驚？
林總將入禮賓府？
老實講，喺豬流感爆發初期，政府高官都講過食豬冇問題，連內地官員早前亦曾經公開呼冤，話內地豬冇問題，無非都係想市民食得安心啫。
咁聽過李大董呢番說話，當然係話食豬肉完全冇問題啦，似乎仲係話中國人食得豬內臟多產生抗體添！咦！突然諗起外國人唔鍾意食內臟，唔通因為咁，所以冇抗體，以致歐美疫情爆發得咁嚴重？李大董嘅食豬內臟抗疫理論，究竟係唔係怪論，就要由大家自行判斷嘞！
另外，同場仲有近日被傳係特首辦主任熱門人選嘅奧馬公司行政總裁林煥光，林總拖埋太太入場輕鬆睇賽事，隻字不提政事，只肯透露奧馬工作仲有少少手尾跟，言下之意係咪意味執埋手尾後就直奔禮賓府？