呢，有間日本車廠見機不可失，主動提供最新型號嘅電動車畀港府試用半年，希望可以飲到頭啖湯。鬍鬚曾見有咁好嘅演出機會，即刻彈出嚟做騷，仲發揮吹水唔抹嘴嘅本色，話電動車可以製造龐大商機以及創造就業喎。
政府如果真係掂嘅，咁就一天都光晒，電動車唔會排放廢氣，既環保，又可以慳錢，唔使再畀加快減慢嘅油魔鋸到一頸血，的確係唔錯㗎。
不過唔好高興住，等太一叮考吓大家，知唔知電動車邊度有得賣？車行？Sorry，車行乜車都有得賣，唯獨冇電動車。好嘞，就算畀你叻到真係買到架電動車，咁你知唔知去邊度叉電吖又？油站？又錯，油站乜油都有得入，就係冇得為電動車叉電。
事實上，電動車要普及十畫都未有半撇。配套措施要乜冇乜，鬍鬚曾空槍上陣話打造綠色經濟，認真得啖笑。早喺○二年，政府曾提供每輛八萬元津貼，鼓勵業界試用環保電動小巴，效果如何呢？汽車業界用四個字形容，就係「失敗之作」。
原因好簡單，業界指電動小巴叉電五、六小時只能行駛約八小時，根本唔符合成本效益。你試吓有部手提電話乜嘢功能都齊晒，每日要叉電五、六個鐘，但只能用八個鐘，送都冇人要啦！
環境局局長邱騰華前排仲特登飛咗去外國取經，叮！使鬼去到咁遠咩，喺香港求其問一個三歲細路仔都知，如果電動車技術真係成熟嘅話，外國老早就普及咗啦！
鬍鬚曾自己都承認目前最大嘅困難係電動車嘅電池容量以及充電裝置，仲話會領導推動使用電動車督導委員會，研究點樣改善城市設計，增加多啲配套。
聽住先啦，呢個鬍鬚曾次次講就天下無敵，做就有心冇力，政府話推動電動車，已經講咗N年，有商人同本港一間大學研發小型電動私家車，一直冇得到政府支持，可見佢哋淨係識得吹水及做騷，最多都係得三分鐘熱度，劑劑虎頭蛇尾。
潮流興環保，經濟機遇委員會早前提出六項優勢產業，當中竟然有環保產業喎，都唔怕笑大人個口。唔知所謂環保產業包唔包括電動車呢？叮！唔該鬍鬚曾唔好再匿喺冷氣辦公室閉門造電動車，打開窗望吓個天啦，吹水係吹唔出藍天白雲嘅。