本港多間大學都唔夠學生宿舍，尋日長江製衣創辦人兼慈善家陳瑞球捐出一千八百萬元支持科大做基建，科大嘅學生宿舍荒有望紓緩。校長朱經武快將離任，得知科大被列為亞洲第四位，話科大師生都好鼓舞，但佢個人就唔係咁睇重排名。
朱校長尋日亦兼任導遊，帶大家參觀科大宿舍，仲講番當年做百厭大學生嘅經歷添。佢早年喺台灣成功大學讀書，當時宿舍嘅房間只有二百幾呎，但就逼滿八個宿生，佢記得當時嘅學生有嚟自越南同柬埔寨嘅，但彼此相處融洽，唔會爭枱讀書。
最好笑係當年宿舍唔准煮食，但有同房偷偷走去儲物房搭電線煮臘腸飯，食到大家津津有味。違規算小事，佢仲試過偷偷用錄音機錄低校長講話，返到宿舍後模仿對方口脗講嘢，引嚟同宿舍嘅同學哈哈大笑。