立法會兩個事務委員會訪粵團後日出發，早前泛民議員玩嘢，諷刺個團係「雙規」，搞到立法會要變陣，決定對所有團友一視同仁，一律唔畀遲到早退，點知呢個安排掉轉頭引起部分有證嘅建制派議員不滿，有人唔報名，有人報咗名要退團，人數真係買少見少。
其實呢個團四日三夜內要遊勻四個廣東省城市同八個景點，對嗰啲成日北上嘅有證議員嚟講真係冇乜吸引力，加上將會會見嘅內地官員亦晨早識晒，為免隨團成為班無證議員嘅政治騷布景板，參加意欲真係談唔上係高。同屬專業會議嘅劉秀成、石禮謙同建仔嘅李慧琼近日就以不同理由申請退團，截至尋日，更有接近四成建制派議員宣布唔玩。
建築界嘅劉秀成話，佢原本計劃去完意大利後，自己坐通宵車北上會合其他團友，依家訪粵團話唔准中途插隊，佢惟有放棄。李慧琼亦話本來諗住喺禮拜六晚或者禮拜日朝早提早離團，因為要返港參加訓練課程，立法會唔畀團友早退，佢亦冇辦法。