本港經濟搵唔到新增長點，早輪政府度咗六大產業出嚟，又搵有口水會之稱嘅經機會成立六大小組研究吓，尋日其中一個文化及創意產業小組開會，討論到研發網絡收費遊戲，仲覺得香港有好大發展空間。
腦震盪得個吉
不過，家吓仲未大力發展網絡遊戲，香港已經有電車男（即淨係識得匿喺屋企打機）問題，將來會唔會更加嚴重呢﹖中央政策組首席顧問劉兆佳（圖）一聽到個問題都停咗一停，跟住承認其實會上都有文化界人士提出呢個問題，所以佢哋都要從長計議。咁即係話，呢頭度橋、嗰頭拆橋啫。
呢啲唔知係議而不決，定係議而冇用，總之一班業界翹楚腦震盪好耐後，都係得個吉，下回再議啦。