英國一份最新調查公布咗亞洲區大學嘅排名，香港有六間大學躋身亞洲百強內，其中港大、中大更成為亞洲第一同第二最佳大學，消息對本港教育界打咗支強心針，教育局局長孫明揚都好開心，尋日專登發篇聲明公開賀喜呢啲院校，開心到好似要開香檳咁。
孫公話，香港多間院校喺亞洲最佳大學榜上名列前茅，成績令人欣慰，呢啲高度評價顯示咗香港喺專上教育嘅成就，更有助加強香港作為區內教育樞紐的地位。佢跟住保證政府會同教資會、學界攜手優化本港高等教育。
喺呢件事上，香港人梗係與有榮焉，但口痕友都話，孫公同政府都唔好太自滿，淨係掛住發展乜嘢樞紐，事關本港大學學位不足嘅問題好嚴重，七百萬人口只得嗰八、九間大學，每年可以升讀大學嘅預科生只有一成八，咁低比例嘅學生做到大學生，比起好多國家同地區都肉酸。所以香港喺發展成為教育樞紐前，應該先大幅提升本地居民接受高等教育嘅比例。