本文重點
曾參選舊年立法會選舉嘅會計師龔耀輝近排人氣急升，佢同電視台女主播被傳婚外情引嚟唔少議論，尋日立法會會計界代表「波波」陳茂波同記者聚會，講到當年選舉競爭對手嘅緋聞，波波話如果佢（龔耀輝）知錯能改，希望佢太太會原諒啦。佢雖然冇踩多腳，但就不經意披露自己打嘅心形圖案領呔係太太相贈，呢招恩愛對緋聞，波波一樣不落下風。
當選議員之後，波波同太太成日出雙入對公眾場所，尋日又打條印咗心形圖案嘅灰領呔見記者，仲甜絲絲咁透露條呔係太太送嘅，擺到明晒恩愛，差在冇講埋太太喺乜嘢節日送畀佢嘅啫。
講到龔耀輝單緋聞時，波波話：「一個人做錯事都要畀機會佢，唔應該咁就從此刪除呢個人。」佢嘅說話好溫和，但一句「錯事」已代表佢對已婚男人涉桃色事件嘅態度。
其實，舊年立法會選舉時，龔耀輝嘅中產、專業兼年輕才子形象為波波帶嚟唔少壓力，兩人亦一度拚得難分難解，今次龔耀輝鬧出桃色緋聞，將來如果要競選或出任公職，呢件事都可能成為負資產，但競爭對手就可能反而漁人得利。
五散人下年勢更緊密
講完埕埕塔塔後，波波話鋒一轉，話做立法會議員嘅工作直頭係「忙到癲」，因為佢要坐雷曼小組同西九小組，連退休公務員離職後工作檢討都有摻一腳，單打獨鬥做立法會嘅工作實在太辛苦，所以佢哋「五散人」都有討論過，準備下個立法年度起，五個人分坐唔同嘅事務委員會，希望可以減輕啲工作量喎。
雖然五散人喺呢個立法年度已經開始合作，但唔算太密切，出年如果共識各人分頭坐唔同嘅委員會，就代表五散人嘅合作更上一層樓，如走向功能化、專業化，同政黨嘅運作好類似，五散人睇怕真係要改名喇。