Kidult朝聖大會　TOYSOUL 2015今日開幕

雖然筆者未有正式統計，但夠膽寫包單，港男係全世界最有童心嘅一群男人，唔係咩，玩具展、遊戲展不時舉行，今日就輪到專為大細路而設嘅TOYSOUL 2015開幕，玩具精品、舞台活動、遊戲試玩區包羅萬有，Figure教父Michael Lau仲食正星戰熱潮推出限量版Figure，對一眾Kidult嚟講，梗係非入場不可，提早送份聖誕禮物畀自己嘛！

Storm Fansumer喺星戰白兵嘅外觀上加入各式購物袋，擺明向各位玩具狂迷致敬，至於售價方面就要入場至知，凡幫襯嘅每個送金屬鐵馬一套。

炮製Storm Fansumer之餘，Michael Lau表示好高興TOYSOUL能夠再Encore，仲有愈嚟愈多本地玩具單位加入，睇得出業界百花齊放。

吉祥物「SOULTOY」（中）由Michael Lau設計，鬼魂造型代表咗玩具設計師嘅靈魂所在，現場將有相關精品發售。

Soap Studio推出「蝙蝠俠腦電波戰鬥訓練遊戲」，用念力代替遙控打機，唔通連Batman都可以Jedi上身？

HT《蝙蝠俠對超人：正義曙光》Figure，於場內率先接受預訂。

BigBoysToys嘅街霸系列，全部內置亮燈及發聲系統。

TOYSOUL唔係男人專利，iXTEE就會展出最新嘅妹頭造型及服裝。

李小龍75冥壽辰剛過，呢款Mr.KT就以「Q版青蜂俠」造型向龍哥致敬。

Soap Studio同場展出1/30磁浮蝙蝠戰機，以明年上畫嘅《Batman v Superman》為藍本，畀大家先睹為快。

J.T Studio美猴王植絨會場限定版，做工更加細緻，背後嘅心機值得畀Like。

PLAY展出多款搪膠玩具，當中包括超人之父、七星俠及超人吉田等。

《忍者龜》續集嘅Trailer公布冇耐，threezero就推出1/6忍者龜，毒死人咩？

《人中之龍極》之前只有Demo睇，今次首度提供試玩版。

場內特設扭蛋機及閃卡機，相信80後甚至70後見到，都會大嗌︰「青春呀，我要青春呀！」

即場惠顧PlayStation產品，可以預訂HT的Shock Trooper，後者全球限量450套。

攤位多多　行足成日

原名TOYCON嘅TOYSOUL去年重辦，三日展期吸引逾八萬人次，消費總額去到六千幾萬港元，成績咁好，今年當然要Take Two，場館仲由一層變兩層，邀請咗70多個參展單位、超過180個攤位，絕對夠你行足全日！作為業界中流砥柱，Michael Lau今年唔只幫手設計大會吉祥物「SOULTOY」，仲為粉絲們準備咗「Storm Fansumer」，Michael解畫︰「多年嚟我都想為Fans出番款專屬Figure，咁啱星戰上畫，所以我決定將白兵改頭換面，加入購物袋及鐵馬，向我一班忠心擁躉致敬。」

Batman奇招　念力打機

講起星戰，又點少得Hot Toys？今年佢哋嘅展場擴展至20個，佔地2,000平方呎，當中Star Wars展區就會展出多款星戰1/6 Figure，例如女主角Rey、機械人BB-8、白兵Stormtrooper（Jakku Exclusive）白兵等。另一邊廂，近年火速冒起嘅另一港牌Soap Studio亦都在陣，帶嚟「蝙蝠俠腦電波戰鬥訓練遊戲」，玩家戴上專用放大器，就可以用念力打機，真係估你唔到！其他精彩展品仲有threezero嘅電影版忍者龜、J.T Studio有美猴王、PLAY就出鹹蛋超人搪膠等等，而BigBoysToys仲會公開春麗及軍佬兩款Q版《街霸》新作，Game迷帶定多啲銀彈入場了！

《人中之龍極》　首供試玩

今年PlayStation再度成為重點參展商，布置咗超過58個試玩區，展出28款PS4及PSV遊戲，當中包括首度試玩嘅話題大作《人中之龍極》，以及《Dark Souls III》與《Street Fighter V》等。另外，入場消費可享多項優惠，例如每日首50位惠顧「Star Wars Battlefront PS4限量版同綑裝」嘅客戶，可獲贈限定星戰Tee一件。特別一提，場內特設閃卡及夾公仔專區，又有「驅樂部」舉辦四驅車周年挑戰賽，玩完之後，保證童年回憶返晒嚟！