唔少跑手經過劇烈訓練或者比賽之後，都會出現肌肉痠痛、繃緊嘅現象，第二朝瞓醒，成身赤赤痛，產生「射波」唔願返工嘅念頭都情有可原啫（不過老細一定唔會明囉）！唔想為咗跑步搞到飯碗不保，其實坊間有好多回復性嘅工具、服飾，可以對症下藥解決問題，今次搵到長跑達人「楊Sir」楊肇麟幫手示範，只要跟住做，唔只可以消除「射波」嘅邪惡念頭，最緊要係令身體盡快回復狀態，令下一次嘅練習或比賽有更好發揮。

有朋友或者屋企人幫手，就可用嚟按摩大腿、小腿，記住唔好碌到骨頭，否則都幾痛（口架）！

中間嘅綠色滾筒可以拆出嚟，專門按摩腳板底之用。

Thera-Band Green Roller Massager $290

Foam Roller嘅對應範圍相當大，唔只大腿、小腿，背脊都用到。

Professional Fitness
Roller Massager $258

專為練習與比賽之後設計嘅Recovery Leggings，着住嚟瞓覺，瞓醒嗰陣特別醒神。

身為跑手，想持續Keep住好狀態，除咗練習與比賽之後都要做足Cool Down，加埋Recovery呢一招，就可以輕鬆同肌肉痠痛Say Bye。

身為長跑教練、2011年渣打馬拉松10km組亞軍嘅楊肇麟教路，做足Recovery唔只可以減少痠痛，仲可以令肌肉盡快回復狀態，好好迎接下一次嘅練習或比賽。

Roller Massager

咪睇佢其貌不揚，其實用途多多。使用方法好簡單，跑手先要面向地瞓低，之後由朋友或者屋企人代勞，握住左右兩邊，喺大腿或小腿肌肉上前後滾動，將繃緊嘅肌肉推番鬆，楊Sir補充說︰「盡量避免碌到骨頭嘅地方，因為會好痛嘅。除咗大腿、小腿，呢支按摩棒仲可以將中間嘅綠色滾筒拆出嚟，專門按摩腳板底，用腳掌踩上去，將體重集中喺腳弓位，即係腳掌向上拱嘅地方，向前向後碌，初時細力啲，覺得OK嘅話可以踩得大力啲，有助放鬆番腳板底嘅筋膜。」

Foam Roller

如果冇人幫你用Roller Massager按摩大腿、小腿，其實另有法寶，就算One Man Band都按摩得到，呢件道具就係Foam Roller，只要將自己嘅體重壓上去，繼而前後滾動，就會有按摩效果，楊Sir解畫說︰「可以將成個人嘅體重都壓晒落去，之後向前向後碌，就可以放鬆IT Band、小腿，甚至背肌都得，做到深層次嘅按摩效果。」

Recovery Leggings

唔少跑手喺練習或者比賽時，都會穿着採用壓力設計嘅貼身衫褲，用以減少疲累及受傷機會，原來同一原理，都可有助運動後嘅回復效率，坊間就有唔少Recovery Leggings幫到手，呢類型嘅產品採用漸進式壓力設計，可以改善血液循環，跑手只需喺練習或比賽後穿上，其實穿着時間冇硬性規定，着住嚟逛街、瞓覺都得，只係基於衞生考慮，唔好着多過一日喇，事後就會有好明顯嘅回復效果，大大減少肌肉嘅痠痛程度，第二朝點只夠精神返工，加操再跑過So Easy！

銷售點︰Launch8（荔枝角香港工業中心A座810室）　Facebook專頁︰launch8running　查詢︰3568 3354

文︰Dick　

攝︰Kim