型格二人世界　Audi TT Roadster quattro

相信大家都睇過唔少惡搞短片，片中有人揸「錢七」、有人揸林寶堅尼，測試途人（當然係女生為主啦）會揀邊部坐順風車，結果不言而喻啦！現實係殘酷嘅，有車、仲要係歐洲車，甚至雙座位開篷車，追女仔的確會贏人幾條街，不過你估人人都可以揸法拉利、林寶堅尼咩？做男神，唔一定要幾百萬未開頭，依家$623,800都有交易，事關奧迪（Audi）TT Roadster quattro已經大駕登場。

2.0L直四TFSI引擎不但力量充足，而且對應Start/Stop引擎自動熄火系統，平均耗油量可低至6.7L/100km。

由左至右，三個風口位中央分別設有風速、方向與溫度控制鍵。

多功能軚環備有多枚功能鍵，手不離軚就可對其他裝置發號施令。

電篷控制鍵置於波棍台底部左方，若然換上其他顏色，相信會更易識別。

Audi Virtual Cockpit奧迪全數碼化儀錶屏幕，備有Classic和Versatile兩款顯示介面可供選擇。

全新電軟篷採用輕量化物料製成，開閂時間快至10秒完成。

S Sports座椅加入電動控制功能，四段式腰部承托帶嚟舒適自在嘅乘坐感受。

雙出式尾喉分列左右，加上一體式擾流板，共同構建跑格造型。

頭燈內藏LED燈管，燈號既明亮又前衞。

尾箱最大容量可達280L，以小型雙座位轎跑車而言，已經有交代了。

銀色的油缸蓋設計，賣相似足落場版嘅賽車。

隨車的安全設備相當豐富，備有ABS、EBD和ESC。

由波棍到波棍台都用上銀色設計，與車內主色形成鮮明對比。

MMI Touch觸控面板與控制旋鈕，操控直接又方便。

車廂布局簡潔有序，銀色的風口與波棍台面板最為悅目。

提到開篷車最煞食嘅地方，當然係「無上裝」嘅瀟灑Look，TT Roadster quattro亦唔例外，而且閂篷時都型過人，事關電動軟篷有三種顏色選擇，分別係黑色、灰色及啡色，筆者仲反覆多次又開又閂，需時只係10至12秒左右，據廠方表示，如果車速喺50km/h以內，仲可以一邊行車一邊操作，就算遇上失魂雨，都唔怕淋濕鄰座嘅女士。軟篷設計如此體貼，事關用咗高剛性鋼材、鋁及鎂合金製成，重量只有39kg，比起上一代輕咗3kg，加上軟篷結構混入特別物料，提升隔熱與隔音效果。

MMI手指指發號施令

TT Roadster quattro天生就係一部追女戰車，雙座位設計，大條道理趕絕閒雜人等上車，而且兩張S Sports跑化座椅加入電動控制功能，備有四段式腰部承托調校，就連肩胛位都有充足嘅包裹力，高速攻彎都可穩定坐姿，女士上車都唔怕嚇親。中控台用上全新嘅簡潔設計，三個風口位設計成渦輪扇葉形態，風口正中央分別設有風速、方向與溫度控制鍵，幫中控台慳番唔少地方，至於底下就有橫排停車燈及泊車輔助按鍵；波棍台底部設有MMI多媒體娛樂資訊系統旋鈕，配合MMI Touch觸控板，可以手寫方式輸入導航或娛樂等資訊；緊隨MMI之後方係電子手掣，電篷開關鍵就放喺左方，若果加入保護罩或改用其他顯示顏色嘅話，就會易認好多。另一方面，作為雙座位開篷轎跑，型格、性能先係王道，實用性實在不可強求，TT Roadster quattro嘅280L尾箱容量，其實已經叻過唔少同級對手。

Eye Catching數碼屏幕

就算未載到靚女上車，車廂依然充滿亮點，例如儀錶板安裝咗Audi Virtual Cockpit奧迪全數碼化儀錶屏幕，實用與型格兼備嘅12.3吋屏幕，提供傳統嘅「Classic」雙圓形轉速及車速錶，以及「Versatile」資訊模式兩款選擇。動力方面依靠2.0L TFSI引擎，馬力與扭力輸出分別達230hp及37.7kgm，配合六前速S Tronic自動波及quattro四驅系統，加上車身重心偏低，高速之下，無論路直路彎都穩定如常，而且指向性保持高度準確。新TT Roadster quattro備有多達11種車身顏色選擇，Nano Grey和Tango Red屬於全新配色，配合三種電篷顏色，屈指一數，就有33種車身配色選擇了。