日產（Nissan）Juke及Qashqai都有出色銷情，喺歐洲地區尤其熱賣，睇得出廠方喺設計及打造Compact Crossover車型方面確有一手，最近廠方再下一城，集合歐洲及日本設計工作室嘅創意，前者負責外觀，後者主打內裝，再爆驚喜新作品—Gripz Concept。

鈎形尾燈、懸浮式車頂及向上翹起嘅C柱設計，都屬於Emotional Geometry嘅設計風格。

黑色雙截式碳纖尾翼，增加下壓力之餘，亦比傳統嘅單片式破格得多。

唔只車廂布局，就連22吋輕量化輪圈嘅賣相，都深受公路賽單車影響。

前上揭式，後對開式嘅車門組合，因為不設B柱，乘客進出分外方便。

車頂用上懸浮式設計，中間係透光玻璃，兩邊就係灰色不透光物料。

獨立桶椅嘅設計靈感，來自公路賽單車嘅鞍座，而且多得2,580mm嘅軸距設計，車內空間並不失禮。

圓形儀錶板似足放大咗嘅三圈式腕錶錶面，錶迷見之必Like！

軚環上嘅印花字樣，同輪胎上嘅一模一樣。

240Z Rally變種回歸

擁有跑車化嘅流線美，又有SUV嘅高離地距底盤，Gripz Concept嘅設計靈感來自上世紀70年代、贏過Safari Rally嘅Datsun 240Z Rally，廠方表示Gripz Concept既適合喺城巿行走，亦有喺崎嶇地形游走嘅本事。車身配色跟240Z Rally相似，至於側門設計更見心思，前大後小之餘，前門屬於上揭式，後門就係對開式，加上不設B柱，有型之餘，亦都實實在在方便乘客進出。輪拱下藏有22吋輕量化輪圈，造型參考咗公路賽單車，輪胎就係Bridgestone專為Gripz設計，上面印有紅、白雙色字樣。

另一方面，Gripz仲應用咗Emotional Geometry設計風格，當中包括V-Motion鬼面罩、鈎形頭尾燈組、懸浮式車頂，以及向上翹起嘅C柱四大項目，其中懸浮式車頂由中間嘅透光玻璃，以及兩邊嘅灰色不透光物料組成，再以黑色雙截式碳纖尾翼作為延伸。此外，霧燈組內置攝錄鏡頭，可以將即時拍低嘅片段，傳輸到電腦、平板及智能手機作實時播放。性能方面，暫時只知採用油電Hybrid混能系統，比重上以電動部分為主，動力來自電動馬達，汽油引擎純為發電之用。

疑似單車迷手筆

車廂內有2+2座位布局，而且與車身一樣用上雙色設計，與四周嘅米白色飾板及碳纖裝飾形成鮮明對比，日本團隊更巧妙地引入咗大量嘅公路賽單車元素，包括軚環及中控台，其中四張獨立跑化座椅、門邊及中央扶手，設計靈感都係來自公路單車嘅鞍座，而加速及制動腳踏，更加似足公路賽單車嘅腳踏款式，唔通日本團隊之中有單車發燒友？他日落實量產嘅話，會唔會喺車頂或車尾加裝單車掛架呢？

文：Konnie