Xplorer系列入門組裝

航拍效果獨特，搞到唔少人都心思思想玩吓；可惜一般航拍機售價動輒五位數，門檻高咗啲！其實入門都有好選擇，就係國產航拍品牌Xiro推出嘅Xplorer系列，佢採用模組式設計，好似砌模型咁組裝零件，最重要係五千蚊左右已可埋單。

機身軸距350mm、高度為50mm，連埋電池重1.22kg，機身比DJI Phantom 3系列細部。
$3,399（Xplorer標準版）、$5,399（Xplorer V）、$5,399（Xplorer G；不包GoPro）

三個版本設計都相同，這款是Xplorer G的解構圖，機身中央嘅鏡頭就係GoPro Hero 4。

遙控器設有隱藏支架，可以放置手機，毋須駁線連接。

系列中的 V版本的自家鏡頭，可以拍攝1,080p影片，鏡頭頂部設有microSD卡槽。

大部分組件都可以分拆組裝，砌法簡單，維修、保養時配零件都特別容易。

智能電池可連續飛行約18分鐘，另設有按鍵，一按即顯示剩餘電量。

《Xiro》應用程式可以同步顯示拍
攝畫面，同時會提供GPS、電量等資料。

三版本各具特點

今次Xplorer系列行貨有三個版本，包括不設雲台及攝影機嘅標準版，畀大家純粹體驗飛行；另一個叫V版本，備有Xiro原廠攝影機，可以拍攝1,400萬像素相片及每秒30格1,080p全高清影片；此外仲有專為GoPro而設嘅G版本，佢備有專用雲台，毋須駁線，將相機套入槽位即可使用。三個版本外形大同小異，用上傳統四軸式設計，有別於DJI Phantom系列，Xplorer線條硬朗得多，表面用炭黑色磨沙塗層，配合螢光綠條紋點綴，相當有型。此機最大特色，當然要數到其模組式設計，電池、螺旋槳、飛控中心、相機組件統統可以由機身支架中拆出，裝拆過程似足砌模型，約兩分鐘就完成。咁樣設計方便攜帶同埋存放外，維修、升級都容易得多，想提升拍片質素的話，只需要更換鏡頭組件；壞機時亦只需針對性更換相關零件就得。

具多款飛行功能

呢個Xiro Xplorer系列設有實體遙控器，佢有個支架安放手機，透過Wi-Fi訊號就可以於《Xiro》應用程式上查看飛行資訊以及同步觀看拍攝畫面。用遙控桿即可控制機身升降、旋轉、轉向，亦可靠右上角轉輪調校鏡頭方向；唯一要扣分就係未有錄影同埋拍攝鍵，必須要篤手機芒。此外，Xplorer系列提供自動起飛及降落功能，兼且設有自動追隨用家移動嘅Follow Me功能，以及可以固定半徑距離環繞飛行嘅Around Me功能。此機操控相當容易，轉向、盤旋都好穩定，初哥不妨先買最平嘅標準版，玩熟之後先考慮加建邊款鏡頭組件，慢慢升級。