PUMA特製 飛人加操拍檔
無論游水、球類以至田徑，其實好多唔同類別嘅運動員，既要練好「主修科」，仲要密密入健身室加操，練習密度絕對唔會少過本身嘅專長項目，正如飛人保特（Usain Bolt）參加第15屆世界田徑錦標賽前所講︰「鍛煉唔係喺田徑場，就係健身室……跑道上可以練習耐力及比賽技巧，例如起跑、起動、100m及200m項目嘅轉換等等，至於力量鍛煉就要喺健身室進行。」喺跑道上每快0.01秒，甚至0.001秒，其實都係喺健身室累積無數汗水換番嚟嘅成果。
保特於北京成功衞冕，而且第三度喺世錦賽男子100m封王，又再屈機做飛人。
Ignite XT Training（男裝） $759/款
Ignite XT Training（女裝） $759/款
鞋面用上無縫製作，輕巧之餘，透氣網布就可增加舒適度。
為咗對應橫移動作，鞋帶窿追加支撐束帶。
中底沿用全掌式Ignite Foam，緩震與回彈並重。
外底改用菱形膠粒，外側比內側為大，抓地力高又可減少腳掌過度外移。
Power ACTV SS運動壓力上衣（男裝） $499
Power ACTV 2-in-1雙重運動短褲（男裝） $499
內膽內部設有ACTV膠貼，有助加速血液循環。
PowerShape Bra $399
Mesh Up Layer Tank運動背心（女裝） $299
PowerShape緊身壓力褲（女裝） $599
PowerShape運動外套（女裝） $699
啱啱喺北京舉行嘅第15屆世界田徑錦標賽，保特喺男子100m短跑以0.01秒嘅優勢力壓美國對手基寧（Justin Gatlin），跑出9秒79成功衞冕，0.01秒，對凡夫俗子嘅你我他嚟講，看似冇乜意義，但係對呢位飛人而言就感觸良多，保特喺賽前都講過︰「我哋喺田徑場及健身室內，已經數唔到操咗幾多個鐘；短短十數秒嘅比賽，睇就好輕鬆，背後其實落咗好多苦工先至可以喺跑道立足。」陪住保特練到身水身汗都要Keep Going嘅，唔只教練Glen Mills，仲有拍檔超過10年嘅PUMA，既有田徑場所用、今年初推出嘅Ignite跑鞋，最新嘅健身室裝備，就有Ignite XT Training訓練鞋，以及一系列嘅ACTV練習服飾。
Ignite走入健身室
驟眼看，Ignite與Ignite XT Training看似一樣，其實變化盡在細節中。Ignite XT Training嘅鞋面同樣用上無縫製作及透氣網布，但係支撐框架已有明顯分別，尤其是鞋頭框架由直變彎，最大改動係鞋帶窿多咗支撐束帶，事關健身室內嘅力量鍛煉，涉及好多橫移、多方位轉向動作，唔似緩跑練習以直線為主，故此Ignite XT Training嘅鞋面刻意加強兩側嘅支撐效果。中底用料依然係緩震性強、回彈力高，而且耐用嘅全掌式Ignite Foam，不過出於橫移動作及重量訓練需要，鞋底中心以至兩側都加厚咗。外底變化最為明顯，由於Ignite只需應付直線行進，故此劃分為多個面積較大嘅長方形，Ignite XT Training就改為細細粒嘅菱形膠粒，以便任何方向嘅動作都發揮到十足嘅抓地力，而且大細有序，外側嘅膠粒明顯較大，加強「煞停」能力以防腳掌過度橫移。
ACTV加強血液循環
服飾方面，Power ACTV SS運動壓力上衣用上Lycra製成，後者屬於高彈性嘅衣料，貼身之餘唔會阻礙身體擺動，最大賣點係衫內嘅肩膀位置加上ACTV膠貼，藉促進血液循環，減少肌肉疲勞及受傷嘅機會，讓用家可以放心無慮進行負重動作。顧名思義，Power ACTV 2-in-1雙重運動短褲亦都用咗ACTV，不過唔係貼於褲內，而係長至及膝嘅Lycra內膽，全面緊密支援大腿肌肉，又有打底作用。
做運動冇分男女，今次PUMA Training亦備有體貼嘅女裝項目，上身就有PowerShape Bra，網面物料唔只透氣，而且高度貼身，加埋交叉背帶設計，發揮充足嘅承托及支撐作用；與之配合嘅Mesh Up Layer Tank運動背心，鬆身剪裁讓用家可以隨意擺動，而且coolCELL衣料加上開放式網面排列，加埋背脊嘅大開孔設計，出汗再多都可快速揮發，保持身體乾爽。下身配搭就有PowerShape緊身壓力褲，Lycra物料加上褲管外層嘅運動膠帶，減少雙腿肌肉喺劇烈運動中過度移位，讓用家遠離受傷風險之餘，亦可盡騷女生努力鍛煉下嘅線條美。
查詢：2834 3821（銅鑼灣崇光百貨四樓PUMA Store）
文︰Dick 攝︰Homan（產品）
