Agito Ground Form 真骨雕重生
「平成」兩個字，原本係拉打粉絲年齡群嘅分水嶺，鍾意昭和拉打者，係老餅、Old School；而平成擁躉就係新生族，不過睇見啱啱上架嘅「SHF真骨雕」Masked Rider Agito Ground Form，不得不感嘆歲月如飛。亞極陀（Agito），平成年代嘅第二位主角拉打，不經不覺已經面世14年了，想當年因為佢而中拉打毒嘅小朋友，今日都已經長大成人，如今亞極陀藉「真骨雕」重現人間，又會勾起你幾多童年回憶？
SHF真骨雕
Masked Rider Agito Ground Form
建議零售價︰¥5,000
Ground Foam係亞極陀嘅基本形態，唔似Storm Form及Flame Form有武器傍身，以拳頭交為主，隨盒就有八款造型手掌切合所需。
冇用Blu-Tack、亦冇PS，就算腳掌唔係金屬Parts，依然擺到單腳甫士，接地性都算有交代。
Boxset附有兩款頭雕，分別係基本形態（左），以及激戰時嘅爆角形態。
胸口中央及腰帶外層都用咗透明殼，現出內裏嘅機械紋理。
雖然係2001年嘅作品，但係亞極陀依然令人難忘，事關唔只繼承咗前作「古迦」（Kuuga）嘅多段變身，仲加入G3及Gills兩位要角，組成拉打鐵三角，維護正義唔再孤軍上路。
健身成功唔再牙籤
作為目前最普及嘅拉打Figure系列SHF，早喺2009年已經出過亞極陀Ground Form，事隔六年，如今獲選為升級版「真骨雕」嘅新成員，先以整體造型而論，的確比舊版霸氣咗，身形比例更加擬人化，尤其是胸口、上臂以至大髀都粗壯咗，與舊版SHF嘅牙籤人身段截然不同，而且黑色位置做咗消光處理，消除咗舊版嘅「膠味」，至於金色塗裝亦見實淨，可惜只限於頭部與胸口，前臂、膝頭與小腿嘅金色塗裝略嫌單薄，金屬感有所不足。
頭雕造工有讚有彈
至於雕工方面，真骨雕的確比舊版SHF精細得多，先以頭部為例，面部以及嘴位用咗分件處理，突出層次感；胸口中間嘅長方形，以及變身腰帶中央嘅「三風車」，都可透過外層嘅透明組件，睇到內藏嘅精細機械紋理，咪唔記得就算係升級版嘅真骨雕，Figure高度都只係145mm左右，同舊版SHF差唔多，可見廠方喺雕工上真係花多咗心機，唔怪得售價都高咗一倍（SHF Agito Ground Form嘅建議零售價係¥2,500）。正正價錢貴咗一倍，筆者要求再高都好合理啩，除咗上文提及嘅金色塗裝有參差，最令人接受唔到係頭上大角嘅背後有明顯嘅水口位，若然亞極陀嘅其他形態，例如Storm、Flame、Trinity、Burning及Shining等都會加推真骨雕版本嘅話，咪再重複犯錯啦！
查詢︰2433 1828（瑞華行）
文：Dick 攝︰Chris
