去年九月「佔中」變「佔鐘」，筆者最近收到風，今年中環又會畀人Occupy，無論咩色絲帶都唔使激動住，今次「佔中」唔使捱警棍或者催淚彈，仲包你笑住嚟、笑住走，事關此乃體壇大事，就喺荔園隔籬、摩天輪附近，adidas HK大興土木Set Up咗一個綜合運動基地—adidas Sports Base，歡迎各位運動迷到場盡興一番，實實在在全民運動迎暑假！

林書豪昨日率先到場試玩，仲同成班粉絲Selfie，隨即放埋上FB。

多位本地體壇好手，由左至右包括瑜伽教練魏秋琪（左）、長跑好手紀嘉文（中），以及「GPS」左閘張健峰，都落力為adidas Sports Base宣傳造勢。

籃球場設有NBA球星練習所用嘅自動射球訓練機駐場，畀球迷練習全方位嘅控球與射球技巧。

包括方誠義（中）、梁民熊（右四）、蘇伊俊（左三）及方錦興（左四）等多位甲一球員，除會喺adidas Streetball Challenge露兩手外，仲會擔任Streetball Academy教練。

呢部自動發球機既可自設發射高度與角度，仲有「落篩」功能，既可作為龍門練習時嘅對手，亦可鍛煉球員嘅控球能力，尤其是First Touch射門。

場內設有小型足球場，Megaturf Cool Plus草皮散熱快又唔易積水，無懼炎夏天氣。

身處中環海濱，對住維港打波、跑步、練瑜伽，唔再係癡人說夢，而且即將發生，事關就喺摩天輪下、荔園隔籬嘅adidas Sports Base，昨日已經由林書豪大駕光臨主持開幕禮，7月2日就會正式對外開放，喺為期五個多星期之內，成為屬於全香港人嘅運動公園，Are You Ready？

男女子組開班授徒

每逢夏天adidas就會舉行Take on Summer大型推廣活動，一於向「夏日炎炎正好眠」說不，今年更加大興土木建成咗adidas Sports Base。呢度唔只有籃球場及足球場，仲可以變成健身、瑜伽及跑步訓練場地，除咗舉行賽事及Streetball Academy活動外，其餘時間都會免費對外開放。adidas仲會開班授徒，例如歡迎男女老幼嘅「Run Pro」、「Boost Central」、「Urban Run」及「Run Around HKI」等跑步班；男生健身項目「adidas Circuit Training」；以及專為女生而設嘅「#mygirls Yoga Class」瑜伽訓練班及「#mygirls Run」跑步課等等，全部不另收費，仲有專業教練帶隊，想知課程內容及報名方法，就要密切留意三間聯盟嘅Facebook專頁了。

體驗J Lin射球訓練

對球迷而言，打街場落樓下都得啦，使乜咁遠去中環？adidas Sports Base嘅場地布置又豈是一般街場可比，先講籃球場，球場設有篷蓋，唔怕風吹雨打之餘，大會仲專程由美國運咗部自動射球訓練機，「J Lin」林書豪都係用呢部機練波，呢部機器可以自動向17個位置發射籃球，連力度都有得調校，畀球迷練習控球及射籃，事後仲會計埋你嘅入球命中率。至於足球場同樣講究，首先草面用咗由德國研發嘅Megaturf Cool Plus，唔似一般人造草場咁悶熱外，而且唔易積水，器材方面就有一部自動發球機坐鎮，最高球速可以去到140km/h，又可以調校角度及力度，仲可以「落篩」，據知多支大球會都會用嚟練控球，就連保方都用嚟練守龍，除此之外，入場球迷仲可以試玩adidas SMARTBALL，想知自己有幾重腳頭，射波準唔準，記住試了！

adidas Boost Your Summer小資料

地址︰中環海濱活動空間（鄰近摩天輪）

公眾開放日期︰7月2日至8月9日

開放時間︰7:00am-11:00pm

入場費︰ 全免

Facebook︰www.facebook.com/hkteamadidas

文︰Dick　攝︰Homan（部分圖片由adidas HK提供）