今年係二次大戰結束70周年，今時今日應該唔會有WW III啩？但Never Say Never，你以為現今社會比70年前進步嗎？喺本地知名設計師劉斯傑（Kit Lau）嘅眼中，人類聰明反被聰明誤，由佢創作嘅科幻故事《Acid Rain》，就預言人類因污染問題而掀起資源爭奪大戰，生靈塗炭之餘，就連一口潔淨空氣都變得奢侈，人人都要戴防毒面罩才能維生，灰暗程度仲衰過歐洲中世紀嘅Dark Age。

Acid Rain Bucks Team Argus $187

Acid Rain Bucks Team Jack 187

Acid Rain Bucks Team King $187

Argus係隊中嘅狙擊手，面罩兩邊都多咗瞄準器具。

偽裝網之下仲有一層紗布，服飾配搭相當重手。

唔只腰間，就連背脊都有槍袋，令Jack隨時都可以有槍喺手。

Acid Rain嘅士兵造型多數都係頭盔加面罩示人，Jack就有別於主流，設計成怒髮衝冠嘅個人主義Look。

King獨有短棍傍身，可見呢個角色係少有嘅格鬥專家。

雖然比例只係1/18，但細緻度未有打折扣，就以King為例，頭盔與手臂都有清晰嘅部隊標誌。

喺呢個污染嚴重的世界觀之下，劉老師所創作嘅一系列軍人角色，無論係原著插畫或實物Figure，個個都以面罩Look示人，而且充滿實戰Feel。

愈污糟愈有Feel

就以當中嘅「公鹿小隊」Bucks Team為例，繼早前推出嘅隊長Bob及重炮手Steel之後，今期又有三位生力軍入隊，分別係狙擊手Argus、槍王Jack，以及埋身戰專家King，全身用上啞色塗裝之餘，仲有重手嘅舊化處理，例如護甲及武器上都髹上銹迹，而戰鬥背心及軍服亦滿布油污，個個都久戰沙場。至於可動性方面，Figure比例為1/18，雖然高度只有10cm左右，但係頭、頸、胸、腰、肩、肘、腕、髖、膝、踝等位置都有可動關節，足以擺出各種戰鬥甫士。

兵種不同裝備各異

因應兵種不同，Argus、Jack及King嘅隨身裝備亦有分別，例如Jack嘅戰鬥背心比較平滑、流線，唔似King咁樣掛滿口袋，而且三人都以蒙面Look示人，但頭雕絕非一模一樣，King沿用傳統嘅頭盔Look，而Argus出於任務需要，面罩兩側加上瞄準器具，最有型、最有個性係Jack，唔戴頭盔，頭髮Gel晒向上，十足超級撒亞人。至於個人武裝嘅分別更加明顯，King有突擊步槍傍身之餘，仲獨有一支短棍套喺前臂上，攻防合一；Jack唔只係雙槍客，可以左右開弓之餘，隨身手槍就有五支咁多，腰間及背脊都掛滿槍袋；Argus嘅裝束就最重型，唔只有成個人咁高嘅大型狙擊槍，仲有以偽裝網製成嘅外袍，似足現實世界中嘅狙擊手形象。筆者記得之前訪問劉老師，問過點解《Acid Rain》嘅世界觀會咁灰暗，劉老師就表示︰「我聽過一啲大師級嘅作家演講，佢哋認為想傳達環保訊息，就唔應該再傳達『希望』，反而一個『絕望』嘅故事，這樣才更易令世人警惕。」照現況嚟睇，恐怕《Acid Rain》嘅氛圍要再加多幾錢重，世人先至識驚，現實真係可悲！

網址︰www.acidrainworld.blogspot.com、www.oritoy.com、skronex.com

銷售點︰Ant Toy（旺角煙廠街31號2F）