身為Air Jordan嘅Die Hard粉絲，呢期真係阿寶上身︰「畀我哋抖吓得唔得？」繼AJ VII Retro Hare及Bred AJ XI Retro Low之後又有神物復刻，仲要係「老祖宗」AJ I OG Bulls，想收手都唔得啦！咪住，呢款唔係兩年前復刻過咩，咁快又Take 2？世事點會咁易畀你看透，同之前嗰對復刻版相比，你就知道今次嘅AJ I OG Bulls繼續要你欲罷不能，魔鬼誘惑盡在細節中。

AJ I Retro OG Bulls

AJ I Retro OG Bulls $1,249

黑、白鞋帶係意料中事，估你唔到係送多對紅色，而且唔係無緣無故，係有根有據，因為MJ真係着過紅色鞋帶嘅AJ I比賽。

喺Jumpman Logo之前，AJ I同II都係用飛翼Logo，AJ I Retro OG Bulls當然跟足。

鞋舌由Jumpman變番Nike Air，美中不足係顏色調轉咗，當年係白底紅字喎。

據買咗兩年前嗰款復刻版嘅同事報料，今次AJ I Retro OG Bulls嘅真皮用料更靚，又多個唔買唔安樂嘅理由。

鞋帶窿做番足九個，唔再係八個爭一個，若果日後嘅復刻版都跟到咁足就好喇！

老老實實，鞋盒嘅還原度比唔上AJ I主體，不過底部嗰行「1985 Air Jordan I」字樣，都算窩心。

的而且確，兩年前係出過一款同樣係公牛配色（白×紅×黑）嘅AJ I High Retro，顏色都算神似，但係細節同原裝版本仲有距離，令唔少忠粉覺得遺憾，至於即將推出嘅AJ I Retro OG Bulls，終於算得上係呢21年嚟最忠於原著嘅復刻版本，所以無論你有冇之前「買住先」嘅復刻版都好，今次嘅「真復刻」AJ I Retro OG Bulls，絕對係唔買唔安樂！

元祖細節跟到足

捧到咁高，AJ I Retro OG Bulls又有幾原味先？當你打開鞋盒嗰一刻，已經令你想當年，1985年首度推出時，只有最底嗰一排鞋帶窿穿咗鞋帶，成塊白色鞋舌冇遮冇擋Show晒出嚟，呢個咁特別嘅安排，就別出心裁喺今次嘅復刻版重現。除此之外，今次嘅鞋帶窿數目係每邊九個，跟足當年設計，唔係之後嘅復刻版冇啦啦變咗八個。至於上次復刻版最為人詬病嘅地方，係鞋舌用咗Jumpman Logo，Jumpman Logo係AJ III首創，有乜可能時光逆轉出現喺AJ I身上？咁同啲事事旦旦嘅膠劇，拍古裝片會有貨Van同綠茶膠樽入咗鏡有乜分別？今次嘅AJ I Retro OG Bulls總算還原歷史真相，鞋舌用番當年嘅「Nike Air」字樣，而鞋尾亦變番平滑一片，冇再畫蛇添足加任何Logo上去。更加要畀Like嘅係，隨盒唔只有黑白雙色鞋帶，今次仲加埋紅色，記性好嘅球迷應該記得，當年「波神」Michael Jordan真係着過紅色鞋帶嘅AJ I上陣。如此神物，很想要吧！就同AJ VII Retro Hare及Bred AJ XI Retro Low一樣，AJ I Retro OG Bulls又係要—抽，今日開始進行網上登記，各位爸打，都係嗰句︰祝君好運！

銷售方法

有意者可於即日中午12時起至本月28日晚上11時59分，到指定網站填妥登記表格參與抽籤，中籤者將獲電郵通知（未獲通知者當落選論），並安排於本月30日至6月2日到指定商戶選購，當中細節或有更改，一切依官方公布為準。

登記網址︰http://preorder.nike.com.hk