美圖M4女神專機

要影索爆自拍未必要花近九千蚊買「自拍神器」，三千零蚊嘅手機一樣搞得掂，佢就係美圖M4喇！此機係由研發《美圖秀秀》App嘅美圖公司推出，M4已經係第三代產品；一如以往用自拍做賣點，前後置1,300萬像素鏡頭本身都夠犀利，仲引入大量美顏功能，呃Like成本十分划算！

備有4.7吋屏幕，可惜解像度只有720p；採用由Android 4.4改良而成嘅MEIOS2介面，設計美觀，操作亦順暢。

後置鏡頭備有雙LED燈，擺位一左一右，可令光線更平均。

機側備有自拍鍵，長按即可開啟鏡頭，再按就會啟動3秒倒數自拍。

附送多樣配件，包括兩款芒貼、卡針、防塵布等。

前置鏡頭設有LED燈，自拍時可以補光。

機底及機頂都換上金屬物料，手感大幅提升。

Widgets經過重新設計，就連播放器都靚過人。

內置一系列美圖Apps，唔啱用的話可以刪走。

備有應用程式商店，買機時亦可要求店家幫手裝Google Play。

影完相之後仲可以「執相」，《美圖秀秀》嘅功能全部喺晒度！

試相
用一級美顏，效果超自然，成像媲美自拍神器。

驟眼睇，M4同上代美圖2及M2極似，4.7吋機身採用上下V形設計，機面頂部耳筒下方依舊設有大大個前置鏡頭，加上機背雙LED燈鏡頭，整體布局同上代冇乜分別。然而，M4手工更有心思，機頂、機底及後鏡頭圈位置都改用金屬物料，大幅去除前作嗰浸膠感。配色方面，M4提供招牌粉紅色外，仲有薄荷綠及月光白，其中月光白即係白色配金色，賣相討好。

新一代鏡頭

M4最大賣點當然就係鏡頭，佢前、後置鏡頭都備有1,300萬像素，同上代一樣，不過就換上新一代Sony鏡頭，支援F2大光圈。廠方表示，新鏡嘅降噪技術同埋色彩還原力都表現更佳；再配合Fujitsu新一代Milbeaut圖像處理器，低光拍攝效果就會有所提升。至於後置鏡頭左右各設有LED燈，方便夜拍，而前鏡頭亦備有一粒LED燈，兼且可以長着，喜愛夜蒲都可以隨時Selfie，無懼夜場黑媽媽。

具七級美顏

鏡頭規格夠勁，但都要有軟件配合先影到女神照！M4繼續將《美圖秀秀》App嘅一系列「執靚」功能移植，拍攝介面提供七級美顏功能之外，仲有智能美型、祛斑祛痘、淡化黑眼圈、五官立體化、智能美白五大功能，仲可以同時開晒，黑眼圈、暗瘡等小瑕疵一次過同你消滅，絕對係女士福音！至於主打嘅七級美顏就非常實用，搵模特兒試相，用一級效果已經好明顯，就算開盡七級都唔會太誇張；而且鏡頭內置人面辨識，拍攝時會有一個正方框圖示嚟認人樣，令相片四周背景唔會同時霧化。機能方面，M4搭載八核心處理器、2GB RAM，配合全新MEIOS2自家介面，操作順暢；唯一問題係M4同前代一樣，都係冇得插記憶卡，容量有局限。順帶一提，M4支援中港3G、4G制式，網絡兼容力強。