既然瀨尿蝦同牛丸都撈得埋，點解瑜伽同跑步又唔可以Crossover先，話唔定同瀨尿牛丸一樣試過上癮呢！今年各大體育品牌都強攻女生市場，adidas HK就揀中最受女生歡迎嘅瑜伽及跑步，舉行咗一個大型女生運動會—「adidas Fitmind YogaRun #mygirls」，集合逾千名好動女生，實行一個下晝玩齊呢兩項運動，眾樂樂傳遞正能量，揮發汗水之餘，有份參加嘅絲打們，畀啲掌聲、笑聲你哋自己。

大會安排夠晒體貼，山頂位嘅參加者未必睇到大台？唔緊要，場內劃分為多個區域，每個區域都有兩名導師帶隊，包你跟得到。

女神是怎樣煉成的？被唔少男生封為女神嘅倪晨曦表示，每日都會練瑜伽，就算工作幾忙都會堅持，她說︰「有決心，一定做到。」

除咗單人招式，臨尾仲有好多雙人動作，務求令台下嘅女生同隔籬左右都打成一片，互相傳遞正能量。

跑步環節全程約3km，話多唔多、話少唔少，新手都應付到，況且啱啱先做完瑜伽，呢個運動量都好合理。

臨近終點區，仲有肌肉男幫你打氣兼等你影相，唔怪得個個女生都突然開Turbo，跑得快過平時啦！

瑜伽環節為時約一個鐘，以基本招式為主，包括圖中嘅Dancer Pose，都算易上手。

絲打有Say
咖哩：「好好玩呀，未試過同咁多人一齊做運動，何況瑜伽唔只幫到女仔練好個Shape，仲可以改善柔軟度及平衡力。」

Christy：「其實3km唔算難跑，我哋平時每個禮拜都練開8km、10km，況且今日有風，唔算太熱太焗。我平時玩開Kickboxing，如果下次都有就好喇！」

其實做運動就同行街、食飯、睇戲以至Shopping一樣，都係一大班人開心過一支公，可能你平時上瑜伽或者練跑，都會約埋絲打一齊行動。adidas HK唔只了解少女心事，專登舉辦呢次大型運動會，集合咗逾千名女生參加，而且藉今次活動為思覺基金籌款，幫助受思覺失調影響嘅人士走出困境，做運動仲幫到人，唔怪得一開始報名，所有名額幾乎即日被秒殺。

Round 1練瑜伽　燒脂一小時

活動當日分為兩部分，第一部分就係瑜伽練習，唔只勝在人多，仲充滿星味，事關多位女神級嘅藝人，包括劉心悠（Annie Liu）、陳嘉桓（Rose Chan）、連詩雅（Shiga Lin）、陳瀅（Jeanie Chan）、李靜儀（Heidi Lee）鍾浠文（Zelia Zhong）、松岡李那（Linah）及倪晨曦（Elva Ni）等都玩埋一份之餘，就連主教練團都咁有人氣，當中包括林子萱（Kiki Lim）之餘，仲有型男林德信（Alex Lam）。喺為時約一個鐘嘅瑜伽環節裏，主教練輪流到主舞台進行示範，帶領台下逾千名女生練習，以基本招式為主，包括Tree Pose、Eagle Pose、Dancer Pose及Boat Pose等，就算平日唔練開嘅女生，只要放膽試，都可以身體力行做到「沒有不可能」，整個過程由單人動作開始，尾段練習雙人動作，令台下女生打成一片，係唔係好玩過平日喺屋企對住塊連身鏡Train Alone先？

Round 2跑3km　肌肉男激發士氣

玩完瑜伽，抖一陣，就輪到3km緩步跑，圍住博覽館跑一圈。整條賽道分為Cheering Zone、Bubble Zone及Zen Zone，各有唔同音樂及布置搞氣氛，最有激勵作用嘅都係終點區，因為大會安排咗一班肌肉型男赤裸上身打氣，胸肌賁張嘅程度，以及朱古力嘅結實度都唔輸畀Thor及Captain America，難怪唔少女生見到都仲有力加速，務求快快衝線同佢哋合照，走得慢要排隊尾嘛。

不過跑得3km，好似唔多夠喉，不過參加者之一嘅「咖哩」就話啱啱好，她說︰「頭先先做完瑜伽，點都有少少攰，所以3km唔算短了。如果大會再搞多次，我想加埋游水，因為我鍾意游水嘛，順便可以降溫。」跑步過後，好多參加者都唔捨得走，因為場內有好多特色攤位畀大家盡興，例如派發果汁、雪糕，畀絲打補充能量，同咖哩一樣熱愛運動嘅Christy就話︰「我最鍾意影相區，可以同朋友Selfie，影完相，仲有大屏幕Show番出嚟，好好玩。」Well，女生當然玩得開心，不過三間牌有冇諗過男生感受？咁大個Party，淨係受女生玩，筆者如果唔係有記者身份都唔畀入場，快啲拿拿聲搞多次運動會，不過混雙得喇，千祈唔好#myboys！