Nike Basketball擺陣實戰試雙K

啱啱《福布斯》公布咗一個2014年籃球鞋銷量榜，LeBron James嘅Signature Shoe最好賣，賺咗US$3.4億，跟住輪到Kevin Durant同Kobe Bryant，分別都有US$1.95億及US$1.05億；依家個個都估樓市升定跌，筆者冇本事上車，無興趣估埋一份，反而前瞻今年嘅籃球鞋走勢仲過癮得多，我就好有信心Kobe Bryant及Kyrie Irving都可以入10大，點解？因為試過，真係好着囉！

活動當日唔只有傳媒參與，就連「喬大」喬靖夫（戴頭巾者）都到場玩埋一份，成班籃球人盡興一番，熱血爆燈！

練習項目參考了Irving及Kobe嘅擅長招式設計而成，當中包括Crossover及Jab Step，參加者要試齊兩款新鞋，實實在在感受箇中分別。

Nike HK嘅產品部專家Jamie，於練習前詳解兩款新鞋嘅功能特色，正正因為Kobe及Irving唔同形式嘅「快」而設計定成。

配色列陣 Kobe X Blackout

Kobe X 5am

Kobe X Vino

Kobe X NYC

Kyrie 1 NYC

Kyrie 1 Deceptive Red

Kyrie 1 Flytrap

Kyrie 1 Brotherhood

Kobe X Silk $1,399

除咗鞋面配色，鞋舌背後嘅花紋都充滿東方色彩。

Kobe係NBA嘅天王級人馬，佢對新鞋Kobe X好賣是常識吧，不過Kyrie Irving即使好波，但係資歷尚淺，今年初先至推出個人首款Signature Shoe—Kyrie 1，何解筆者咁快就對呢對新鞋咁有信心呢？因為Nike Basketball早前喺麥花臣室內場搞咗個Media Trail，畀傳媒試勻Kyrie 1及Kobe X，擺明真金不怕洪爐火，唔怕你班波牛糟質，總之就用功能設計要你心服口服。

專家剖析快之多樣性

Kyrie 1及Kobe X都係2015年先推出嘅新鞋款，兩者都標榜「快」，都係演繹出「快」嘅多樣性。活動當日Nike HK派出產品部專家Jamie Lam，喺試鞋之前先為大家上一堂理論課，佢以Kyrie Irving為例，他說︰「Kyrie嘅快，最煞食在於高速轉向，忽左忽右，快到好似有殘影咁款，令人難以捉摸，要做到呢一點，球鞋嘅抓地能力尤關重要，所以Kyrie 1唔只喺外底布滿魚骨紋，就連前掌中底嘅左右兩側都有，再刁鑽嘅轉向動作都應付到。」另一方面，雖然Kobe Bryant嘅年紀有番咁上吓，唔可以段段同啲後生仔鬥快，但係Kobe嘅打法充滿智慧，Jamie說︰「Kobe攞住個波，唔係諗緊下一步點做，而係早就預計埋之後嗰五步，佢好識得幾時先突然加速，令對手防不勝防，所以佢嘅速度表現依然係『致命性』。因此，Kobe X嘅中底用咗緩震與回彈並重嘅Lunarlon，而且前掌加入Free嘅分割式設計，幫助Kobe起步，尤其是後掌設有Zoom Air，而Zoom Air係Nike目前反應最快嘅緩震設計。」

實戰環節球星上身

理論過後，輪到實戰時刻，大會特別安排多項籃球練習項目，包括Kobe擅長嘅Jab Step、Irving嘅Crossover，仲有急停跳射等招式，務求讓參與傳媒好似Irving及Kobe上身咁款，試真呢兩款新鞋嘅功能特性，我哋就派出本報嘅籃球狂迷Gilbert參加今次實戰，事後佢對呢兩款新鞋有咩評價？

今期推介

雖然Kobe X抵港只有短短一個多月時間，不過已經有多種配色上架，最新就有橙色嘅Kobe X Silk，設計靈感來自Kobe本人嘅國際化背景，佢細細個喺意大利長大，其後去到美國發展籃球事業，依家幾乎年年都會去大中華區訪問，就好似籃球界嘅絲綢之路，負起東西文化交流嘅重任。Kobe X Silk就用咗絲綢般嘅橙色設計，而鞋舌背後嘅花紋，令人聯想到絲綢上嘅刺繡。原來籃球鞋唔只Sell功能，仲可以成為偽文青，問你服未？