貴過iPhone 6 Hot Toys俠醫大戰

如果銀包有現金$7,430，你會做啲乜？買iPhone 6？買Apple Watch？定係趁日圓低位瞓身入貨？對Figure狂迷嚟講，就會一炮過進貢畀Hot Toys，訂齊最新嘅兩大神物—Hulk及Hulkbuster，重組《Avengers：Age of Ultron》中兩大巨無霸火併一幕！

HT MMS285 《Avengers : Age of Ultron》1/6 Hulkbuster（左）、HT MMS286 《Avengers : Age of Ultron》1/6 Hulk（右）

Hulkbuster關節多達30個，擺到基本Pose，但頭同腰唔識郁就生硬咗啲。

廠方有第一手電影資料，所以骨架細節、塗裝都跟到足電影設定。

前臂設有裝甲，可以前後郁動。

LED遍及雙眼、心口、手掌、背部和腿部，全部有獨立電池驅動，裝拆要花一輪工夫。

上半身可以放入Mark XLIII嘅半胸像，大玩高迪安式合體招數。

單裝版造型，試玩時發覺20個關節鬆緊度適中，希望大貨都Keep到。

孖裝多咗個Hulk Smask半身素體，可與單裝版嘅下半身合體，惟雙臂接模位有點突兀，希望大貨時會修正番。

Hulk Smask半身素體雖然不能活動，但肌肉賁張甚逼真，亦解決咗包膠Body易變形嘅問題。

怒吼頭雕雙眼可動，眉頭繃緊交足戲，牙齒舌頭亦甚具質感。

新舊頭雕對比，可見新版（圖）表情肉緊唔少，連帶五官都進一步擬人化，冇前作咁卡通Look。

論人氣，Hulk係復仇者中最低嗰個，不過於Marvel世界中，佢差唔多係最好打嘅正派角色，能量同憤怒成正比，HT嘅新版Hulk基本上由舊作改良，肌肉素體依舊有42cm高，並由Joseph Tsang擔任雕刻師，不但細緻無遺地「Show肌」，就連體毛、青筋甚至微絲血管都現埋，予人澎湃嘅爆肌感覺！頭雕就由Clare Yoo及Kyoung Geun Kim兩位韓籍大師操刀，罕有地採用怒吼表情，怒目而視兼露出血盆大口，不禁令人回想第一集嘅經典對白︰「I'm always angry！」

Hulk大大隻有孖裝

吸收過前作經驗，今次新素體嘅顏色有所調整，青色皮膚更接近電影原色，所以即使新舊作可以互換零件，但合體時難免會撞色，玩家要留意了！咪睇Hulk咁大隻，內藏關節都有20個，揮拳、舉臂等基本甫士難佢唔倒，美中不足係腳掌依舊一件過啤膠處理，前後腳企就有欠自然。另外，有見包膠素體拉扯時容易令肌肉走位，今次除單裝版外，仲有孖裝發售，就係配多個咬牙切齒頭及「Hulk Smask」形態嘅半身素體畀大家，頭雕表情跟前作相似，但落刀更為重手，五官皺紋繃緊晒；Hulk Smask不設可動功能，但肌肉造型更加結實像真，極具爆炸力！配件方面，二千幾蚊只係跟兩款造型手掌，就連前作都有送嘅金屬角鐵都慳番，唔係好講得通喎。

Hulkbuster頭號巨無霸

至於Hulk嘅對手Hulkbuster，原著有成3.3m高，化身1/6 Figure，都有足足55cm高，唔只高過Hulk成個頭，就連史前巨物Igor或Iron Monger，拍埋佢身邊都變咗「侏儒」，噸位冇得輸！不過留意重量都有番咁上下，達到6kg，絕對考驗Display櫃嘅載重能力。造型方面跟足Iron Man嘅紅銀金三色傳統，機械骨架、腳掌油壓裝置、背部噴射器、前臂裝甲及一對可動肩甲都一一還原，塗裝師Lok Ho更用盡力「摧殘」，戰損及舊化效果處處可見，但正式推出時會否如Igor般重傷變輕傷，就要拭目以待。

Hulkbuster嘅關節比Hulk更多，有成30個，但礙於頸同腰都不設關節，擺甫士稍嫌生硬。不過機關依然做足，例如發光LED多達16個，遍及雙眼、心口、手掌、背部和腿部，換電池都有排玩！而且仲有合體功能，把前方胸甲打開再放入特製嘅頸部裝甲，就可放入Mark XLIII半身像，HT表示呢一Part嘅製作難度極高，既要騰空內籠空間，又唔可以削弱合體後嘅活動性，個人認為都算值回票價，若然有埋下半身就更Perfect。