Chromebook文書抵用

用Tablet做文書工作夠晒輕便，不過用虛擬鍵盤打字有啲唔就手，就算加個迷你鍵盤都係爭少少。想搵部輕身兼有實體鍵盤嘅輕便電腦，除咗MacBook Air、Ultrabook之外，仲可以考慮多年前已經喺外國推出嘅Chromebook。近期就有好多網民趁特價上Amazon執平機，大量機款減至US$200以下，抵到震；唔玩網購亦得，因為香港都有行貨Chromebook，好似Samsung Chromebook 2就既抵玩又實用。

Chromebook

機側設有USB 2.0及耳機插口，讀取USB手指內嘅相片同文件都冇問題。

用前置720p解像度鏡頭玩Hangouts，視像效果都唔錯。

雙喇叭設於機底，音量輸出突出。

機面用上仿皮物料，與同廠嘅手機Galaxy Note 3、Note 4機背設計相近。

另一機側提供USB 3.0同HDMI輸出，亦有microSD讀卡器。

孤島式鍵盤回彈力不俗，Touch Pad反應靈敏。

台廠Acer近期都有Chromebook登場，其中13.3吋就分為兩個版本，屏幕解像度為1,366×768及1,920×1,080，前者續航力長達13小時，後者續航力亦有11小時，比起其他同類產品長氣。加上採用Nvidia Tegra K1處理器，效能唔錯。 $3,298至$3,498（b）

播YouTube，屏幕亮度、解像度不俗，配合高質喇叭，效果相當好。

《Chrome線上應用程式商店》提供大量Apps，種類多元化。

提供多項語言及輸入法，文書處理絕無問題。

玩遊戲都得，好似《Bejeweled》等小遊戲當然有。

系統順暢

Chromebook、Chrome OS其實早幾年已有，惟當時雲端未流行，自然難普及。依家幾乎全民雲端，簡直同Chrome OS嘅設計概念襯到絕；此系統有別於大家用開嘅Windows同Mac OS，介面基本上只得一個瀏覽器，絕大部分功能都用雲端方式啟動，同用Chrome瀏覽器無分別。用家可以透過網頁使用Google試算表、Google簡報、Google文件、Google+ Hangouts等應用程式，一般文書功能都做得到。嫌唔夠用的話，仲可以上《Chrome線上應用程式商店》下載記事專用嘅《Evernote》、執圖程式《Pixlr Editor》等等不同類型Apps。亦因為Chrome OS功能係以雲端方式使用，所以只係佔用好少系統資源，唔使十秒已經開到機，休眠狀態下一就可以喚醒系統，用落超爽。

離線有計

不過要留意，因為主要功能都設於雲端，一旦冇Wi-Fi，Chrome OS好多功能都用唔着。此時用家可以用設有離線模式嘅Apps，仲可以將好似Google文件嘅指定檔案預先下載或者設定成離線使用，稍為麻煩啲。不過呢個年代四圍都有Wi-Fi，手機都可以分享數據，冇有怕。值得一提，Chrome OS另一優點係夠安全，系統需要透過Google帳戶登入，大部分資料都儲存於雲端；另外仲設有訪客模式，此模式下，應用程式、輸入法等設定都會重置，幾個人共用一機都唔怕整亂資料，公司、學校最啱用！此外，系統已內置多種語言，包括英文、繁體中文，而且有齊拼音、倉頡、速成、注音等主要輸入法，不過速成揀字排位同Windows版本有分別，難免要時間適應。

八核皮面

事實上，Chromebook產品規格部部大同小異，揀機主要都係睇賣相同手工，好似Samsung新出嘅Chromebook 2，機面用上類近同廠手機Galaxy Note 3機背嘅仿皮物料，手感軟熟；而其孤島式鍵盤都好好，回彈力都唔錯，就連TouchPad反應都好靈敏。規格方面，採用Exynos 5 八核心處理器及16GB SSD，配合11.6吋解像度1,366×768屏幕，算不俗；較特別係機底設有兩個2W喇叭，音量輸出又大又紮實，睇YouTube效果好好！另外，機身僅重1.2kg，拎出街夠輕便；加上電池續航力長達8.5小時，用大半日都絕冇問題。