每逢「芒亨」推出,都係機迷的大日子。早幾日星期四中午首批《Monster Hunter 4G》遊戲連同特別版主機落場時,已有唔少機迷聞風而至到旺角Game舖門口第一時間搶購,情況非常之熱鬧。首日遊戲曾經炒至$550水位,仍然有價有市,其實只要本身有質素,任何環境下都一樣好生意嘅!

「Monster Hunter 4G 首席獵人」特別版新N3DS LL主機套裝已附上《Monster Hunter 4G》遊戲。

新N3DS LL主機主要改動在於在右方XYAB掣之上有埋C Stick,方便轉換視點。

特別版新N3DS LL主機的機面設計充滿金屬感,並刻上首席獵人圖案。

今集遊戲以唐多爾瑪城鎮作為對付魔物的出發點。

在唐多爾瑪中央廣場的競技場內可進行測試自己能力的「G級鬥技大會」。

「舊沙漠」獵場環境獨特吸引,高低落差加上斜坡地形都考驗玩家的能力。

以兩支大角為特徵的飛龍種魔物「角龍」,雙角跟其發達尾巴都是強力武器。

充能斧無論在斧或劍狀態下都追加了新動作。

有1:1大「操蟲棍」,去到無理由唔影番張相留念啦!

店內有多達350款由日本直送及別注版商品發售。

特別版主機具金屬感

遊戲固然吸引,連同《Monster Hunter 4G》遊戲的新N3DS LL主機特別版套裝亦一樣吸引。這套「Monster Hunter 4G 首席獵人」版主機機面用上鏡面處理技術,令其別具金屬質感,機面並印上首席獵人的象徵圖案及遊戲名稱,外觀非常醒目,而且香港街價未算太貴,對於想轉大芒N3DS的用家來講確實幾吸引。新N3DS LL主機除擁有大屏幕外,最特別是在XYAB按鈕上多加一個C Stick,方便玩「芒亨」或其他遊戲時轉換視點。雖然名為C Stick,點知設計唔似「蘑菇掣」可以推得郁,但就可以感應到用力方向,手感唔算好,不過總算對打機有幫助!

追加多個狩獵新動作

「芒亨」遊戲點少得造型獨特的巨型魔物,好似今集點題魔物就係遊戲封面上的「千刃龍」賽爾雷基歐斯,牠是一條閃着金色鱗片,擁有超大爪子,雙腿強韌發達,以及能自由翱翔天際的飛龍,霸氣十足!另外唔少以往曾經在系列作現身的魔物、如擁有兩支大角的角龍、擁有紅色彎曲巨大獨角的一角龍與喜歡潛伏地底向上衝的大名盾蟹等都會逐一登場,啱晒各位經驗豐富的獵人。至於獵人所用的武器其實同以往差唔多,經典如大劍、操蟲棍、太刀、片手劍、狩獵笛都用得上,但今集武器外形都有經過微調,而且追加唔少新動作。

艾路合體技超可愛

此外,前作《Monster Hunter 4》已有、具備劍同斧兩種形態的充能斧,會在《4G》內追加了多個新動作,如在劍模式下追加以盾衝撞並可接着使出「高出力屬性解放斬」絕招,在斧模式下亦可使出強化後的「高出力屬性解放斬」。地圖方面,今次加入日間同晚間景色的「舊沙漠」獵場,沙丘上的高低差及斜坡地形為玩家帶來好大挑戰!好受玩家歡迎的艾路在今集遊戲內亦有新搞作,只要有兩隻以上艾路隨行,即可使出「隨行艾路合體技」組成輔助團隊,如組合成孭上大喇叭的「貓式加油樂團」演奏音樂提升獵人的體力同生命值,又可化身為「貓式火龍車」操控裝設大炮的火龍車在旁邊攻擊魔物BOSS,而且賣相更非常可愛搞笑!值得一提的是,跟有中文說明書的亞洲行貨版遊戲亦已在昨天推出,價錢較平,但一定要用行版N3DS主機才玩到。

INFO

類  型:動作

開  發:Capcom

平  台:N3DS

推出日期:10月11日

售  價:$419(日版)、$368(亞洲版行貨)、$2,588(遊戲連新款N3DS LL特別版套裝)

查  詢:2359 7998(電氣良品)

芒亨Pop-Up Store進駐朗豪坊

唔止有新遊戲及特別版主機推出,連「Monster Hunter 4 HK Pop-Up Store」都以期間限定方式於旺角朗豪坊NAMCO 「NAMJA TOWN」內開設。店裏當然少不了有大量「芒亨」精品發售,由T恤、手機掛飾同咕o臣都有,總計有成350款由日本直送及別注版商品;另外還特設「操蟲棍」同「烤肉」影相位,免費畀各位機迷同Fans影餐飽!

開設時間:即日至12月14日

營業時間:11:00至22:45

地  址:旺角朗豪坊9樓03至11號舖NAMCO店內

網  址:www.facebook.com/NamcoWonderPark