G3 Stylus Dual變種特攻

好多手機廠商見旗艦機款好賣的話，都會乘勢加推Mini、Compact等變種版本。LG都唔例外，將G3變身成G3 Stylus Dual，其外形同G3激似，照舊玩大芒窄邊框，不過並非玩Mini，反而係配上Stylus手寫筆兼雙卡。最正係價錢平一大截，二千蚊鬆啲搞掂，抵玩！

外形與G3極似，不過贅手啲。Stylus筆桿採用金屬物料，配上橡膠筆頭。 $2,180

機背大玩金屬髮絲紋，除白色外，另有黑色選擇。

因支援雙卡雙待，故設有雙卡輕觸鍵，一按即轉換主卡。

SIM 1支援3G網絡，而SIM 2僅支援2G。

兩個卡槽均係使用microSIM，另兼容microSD擴充容量。

照舊採用Rear Key設計，單手操作非常方便。

廠方表示電池容積為3,000mAh，而測試機就僅得2,940mAh，不過都應夠用一日。

QuickMemo+可以任意轉筆迹及顏色，寫字、畫畫都好就手。

支援Dual Windows功能，可以將畫面分割，同時開啟兩隻程式。

內置「雙智能卡」功能，可以更換SIM卡顯示圖示、使用流動數據等個人設定。

拍攝介面簡單，提供自動及超廣角兩個模式。

$5,698（16GB）、$5,998（32GB）

相信大部分人第一眼睇G3 Stylus Dual，應該分辨唔到佢同G3有乜唔同！皆因兩者機面設計幾乎一樣，頂部及底部照樣採用弧形設計，亦擁有大芒及窄邊框等特點。不過細心留意，就會發現G3 Stylus Dual其實機身長闊厚度都比G3略增，而且增磅至163g，冇G3咁輕盈。機背殼加入仿金屬髮絲紋，當然唔少得有招牌Rear Key背鍵，熄芒下長按「音量+」就可以啟動QuickMemo+記事，長「音量-」則可以開啟相機，用落方便。

附設金屬手寫筆

資深手機迷應該記得LG曾經推出Vu系列，除有個4：3芒之外，最特別就係備有Stylus手寫筆。今次LG就將手寫筆移植到G3 Stylus Dual；機背左方有個槽位可以收藏Stylus，一抽即用；雖然唔似得另一韓牌支S Pen咁支援筆壓，不過都用上LG專利嘅Rubberdium Stylus，金屬筆桿手感好，亦有個細小橡膠筆頭。試用感覺筆觸尚算靈敏，用來手寫輸入或者以QuickMemo+寫字畫畫都應該夠用。

支援雙卡雙待

規格方面，此機走中階路線，搭載MTK MT6582 1.3GHz四核心處理器以及1GB RAM，效能唔算強，不過整體操作流暢，上網、玩Apps都冇問題。另外亦與G3一樣備有5.5吋屏幕以及1,300萬像素鏡頭，惟屏幕解像度大幅下降至960×540，幸好仍舊採用IPS素材，可視角、對比度都唔錯；而鏡頭則抽走OIS防手震、雷射對焦等頂級功能，對焦慢咗，好在日光下成像都算細緻，叫做合格。值得一提，此機沿用G3嘅Smart Keyboard、Gesture Shot手勢自拍以及Knock Code輕敲解碼都喺此機搵到，而且仲有中港兩地走人士合用嘅雙卡雙待通訊，相當貼心。

同場加映：雙卡強效版G3 Dual LTE

若嫌G3 Stylus Dual機能唔夠勁的話，同期LG仲有部G3 Dual LTE。有別於一般雙卡雙待手機，此機支援香港適用嘅WCDMA、FDD-LTE網絡之外，亦支援內地TD-LTE、TD-SCDMA網絡，非常方便。設計方面，則與G3一樣，玩窄邊框、有Rear Key以及有黑、白、香檳金三色。功能亦與G3相同，用上5.5吋Quad HD屏幕、1,300萬像素光學防手震鏡頭及Qualcomm Snapdragon 801處理器，效能夠強。