其實日本漫畫在亞洲一向都擁有相當影響力，除了日日手執一本日睇夜睇外，由漫畫所延伸出來的卡通動畫、電玩遊戲以至各類型玩具及周邊產品都影響着老中青三輩。此外，更不時會有時裝設計師從日本漫畫中尋找靈感，甚至索性聯名合作，今回就將新新舊舊、官方以及非官方嘅時裝×漫畫跨刀聯名合作全部列陣！

THOM BROWNE ×《進擊的巨人》

如果布朗先生話佢設計來季2015 S/S男裝系列時無參考過《進擊的巨人》的話，咁真係要搵包公同烏盤出嚟夜審先得！整個Fashion Show 38個造型當中差不多近一半都有這種十足肌肉紋理嘅獨特剪裁，雖然THOM BROWNE季季男裝都「爆」，但今季設計直頭真人版動漫Cosplay一樣，有睇過《進擊的巨人》的讀者一定睇得出。同時系列中另一重點設計就是餐枱般的「飛膊」剪裁，加埋前腹嗰排「腹肌」，我只諗起一個人，佢叫：比達！

Human Aliens ×《龍珠Z》

時裝設計師出致敬款式能引發話題之外，亦有外國插畫師以「時裝×漫畫」呢個Formula而廣為人所熟悉。Human Aliens就是近年最人氣之插畫師，在他筆下的一眾《龍珠Z》漫畫人物如杜拉格斯、斯路個個穿上當下最潮之時裝服飾，Air Jordan、Supreme、BAPE、Givenchy連Raf Simons × adidas波鞋都有，以漫畫角色演繹時裝潮流又有另一番風味！

UNDERCOVER ×《幪面超人》

再數舊一點，由高橋盾主理的日牌UNDERCOVER不嬲都開宗明義「We Make Noise Not Clothes」，2011年春夏系列「Underman」就向經典特攝片《幪面超人》致敬，認真程度、拍攝手法以至靈感涉取都真係拍爛手掌，日本人做事就是如此認真細心。

官方聯名系列：Gucci ×《SPUR》×《JOJO的奇妙冒險》

講完幾單非官方跨刀聯名後，都係時候回顧下幾單珍珠都無咁真嘅官方聯名，早在2011年時，意大利時裝品牌Gucci就曾與日本漫畫《JOJO的奇妙冒險》作者荒木飛呂彥及時裝雜誌《SPUR》聯名合作，由《JOJO的奇妙冒險》女主角空徐倫演繹一系列Gucci時裝，並於《SPUR》上連載，2013年更再度攜手合作，由漫畫女主角穿起2013新裝於全球超過80間專門店櫥窗內展示。

JULIUS × 小健

有漫畫前輩荒木飛呂彥打響頭炮，作為後輩的小健（《爆漫》及《死亡筆記本》作者）亦不甘示弱，與日系暗黑品牌JULIUS聯名合作，於日誌《Men's Non-No》中繪畫出穿上JULIUS 2012 F/W系列設計的暗黑漫畫，像真度之高，以及與JULIUS風格之配合實在叫人讚嘆，日式漫畫確實有非一般的魔力。