唔少車主都鍾意幫愛驅扮靚，最直接嘅方法就係換裝原廠車身升級組件，Volkswagen最近就為第七代Golf系列加推升級套件優惠，箇中選擇相當多，包括前後擾流、尾翼、合金輪圈、行李/單車架，以至車內腳踏及門檻裝飾等，讓車主可按個人心意，打造出最啱心水嘅裝潢，口講無憑，今次就用Golf 1.4L GT做實例示範，Show Quail你睇！

Golf 1.4L GT

加裝全車擾流套件後，全車嘅跑味指數即時急升。

車尾置物倉嘅絨布底板下隱藏儲物格，內有德國製嘅HELIX低音喇叭。

改用不銹鋼腳踏及黑色橡膠門檻，大大減少跣腳機會。

於車頂加裝行李/單車架，喺保持車廂五座位布局下，都可以帶埋單車出巡。

頂置尾翼唔只有型，高速行車時仲可增加車身下壓力。

尾門底部裝有電鍍保護邊，尾泵把上方就有不鏽鋼金屬踏板，帶嚟重金屬感覺。

改用中置尾喉後，即時帶嚟跑車Feel。

如果嫌原裝嘅17"合金輪圈唔夠霸氣，圖中嘅19"輕量化款式又啱唔啱心水？

Golf 升級套件小資料

Golf自面世以來，唔只係Volkswagen嘅台柱車系，甚至係歐洲揭背界嘅銷暢之王，今代Golf亦承接強勢，喺香港嘅銷情走勢，更加令唔少日系對手愈嚟愈頭痛。不過因此亦產生咗一個問題，就係既然咁多人都成為Golf嘅車主，唔想部部都一式一樣、千篇一律，今次介紹嘅升級套件正好幫到手，選項多之餘，你想裝晒亦得，揀啲嚟裝都得，換幾多Parts悉隨尊便，夠晒自由度。

加頂架 行李唔怕多

先講外觀方面，今次嘅Golf 1.4L GT全車加裝咗擾流套件，包括前後擾流、側裙、中置尾喉及頂置尾翼，亦都同步換埋19"輕量化合金輪圈，取代原本嘅標準17"款式，令成部Golf GT睇起上嚟頗有重裝化嘅感覺，而且車尾亦都加裝尾門電鍍保護邊，又喺尾泵把上方裝上不銹鋼金屬踏板，既華麗又有實際作用。不過最引人注視嘅都係車頂加裝咗行李/單車架，正好切合戶外活動發燒友嘅實際需要，行李再多都唔怕冇位放啦！

Plug & Play 炮製好聲音

今次嘅升級套件，就連車廂都有份，包括不銹鋼腳踏及黑色橡膠製嘅門檻裝飾，美觀與實用性並重，筆者尤其是欣賞佢嘅防滑設計，喺大雨滂沱嘅日子用車，就算鞋底盡濕，也可大大減少跣腳機會。對於樂迷一族嘅車主而言，就要多加留意安裝於車尾內嘅Plug & Play音響系統，音色當然比原裝音響靚得多，實行將車廂變成流動音樂廳，去到邊都有靚聲同行，特別美妙！對今次升級工程有興趣嘅車迷請留意，若果閣下部Golf嘅車齡少於六個月，惠顧時需額外支付相關稅項，詳情請向陳列室嘅專員查詢。

查詢：3698 9738（Volkswagen HK）