由前身1999年開辦嘅香港漫畫節，發展至今時今日嘅動漫電玩節，老老實實，已經妹仔大過主人婆，Figure、玩具嘅號召力，早已蓋過漫畫本身，今屆亦唔例外，好似深得足球迷支持嘅ZCWO，就繼美斯（Messi）及佩奧爾（Puyol）之後，首展第三款巴塞球星Figure尼馬（Neymar）；另一邊廂，今年《TF4》上畫，當然大吹老變熱潮，身為主人家嘅Hasbro，就有兩款唔入場睇唔到嘅極品「文哥」壓境，即使人龍再長，身為老變粉絲都要親眼望過先安樂啦！

頭雕高度還原尼馬本人招招積積嘅神髓，而且頸上紋身亦都做足，抵讚！

Hasbro亦有自家嘅G1柯柏文Figure，雖然仍屬展品階段，Hasbro表示仲未決定量產與否，不過HT嗰款已經被全城熱搶，相信Hasbro HK唔會有錢都唔賺啩。

今屆ZCWO以巴塞為主題，展區亦布置成球會專營店咁款，球迷置身其中必然加倍投入。

唔只球星Figure，ZCWO仲炮製咗1/6 Mr. Bean，表情生鬼不在話下，貼身西裝及豐富配件亦都見出誠意。

香川本人都仲未着起曼聯新波衫上陣，ZCWO已經率先有辦你睇。

整體而言，馬達Figure嘅完成度已經很高，若然面上嘅雀斑再重手啲就更神似。

雖然冇得變形，不過DMK 03嘅TF4柯柏文真係型到冇朋友，還望DMK 01組件容易鬆脫嘅問題，唔會再喺DMK 03身上出現啦！

場內率先開售嘅天火（Jetfire），可以拆除頭罩，露出真面目，變相玩到兩個Look，會場價$499.9。

同場仲有Stomp ＆ Chomp鋼鎖（Grimlock）壓場，唔只Sell大大隻，又識發光兼發聲，最過癮係背部設有一個握柄，輕輕一拉就會自動變形。Boxset附有一個同比例嘅文哥Figure，可以騎喺龍背上，重演《TF4》嘅招牌場面，會場價$899.9。

球星Figure鬥Chok現身

ZCWO去年動漫節就以曼聯球星省招牌，今屆再接再厲，亦有三款球星Figure於場內舉行首展禮，當中最搶鏡非尼馬莫屬，以2013-14年球季造型為藍本，筆者睇過實物後，特別留意到兩個地方，其一係尼馬真人屬於「瘦蜢蜢」嗰種，ZCWO亦專登揀咗個偏瘦嘅素體襯番佢；其二係頭雕嘅像真度又有所提升，最抵死係嘴角微微上揚、一副少年得志嘅表情，盡現真人神髓。至於另外兩款新Figure，就係曼聯嘅香川真司及馬達（Mata），鑑於兩者都屬於小個子，所以ZCWO亦選用咗偏矮嘅新素體，而頭雕亦保持高水準，例如香川有矇豬眼，馬達就有較高嘅眉骨及鼻樑，除此之外，呢兩款曼聯Figure屬於2014-15年球季版本，所以球衣款式同之前嘅傑斯、朗尼等同系Figure有所不同，最明顯係波衫心口標誌由AON改為Chevrolet，夠In！

展區：E04-E07

新舊文哥型爆登場

雖然《TF4》嘅劇情劣評如潮，猶幸「文哥」柯柏文（Optimus Prime）嘅新造型夠晒破格，相信仍可穩住一班粉絲嘅入貨意欲。在芸芸TF4文哥商品之中，就以Takara Tomy早前預告嘅DMK 03模型最有美感，雖然要等到今年12月才上架開售，不過試辦已經喺今屆嘅Hasbro展區現身，即使只係素組作品，但已經做足分色，當然唔少得火燄紋拉花及電鍍組件，論賣相冇得輸。除此之外，Hasbro仲有另一款文哥Sample現身，採用G1動畫版造型，不設變形功能，一於美感行先，身形健碩之餘又做足舊化塗裝，係唔係同Hot Toys嗰隻好似呢？冇錯，兩者的確係同一個Project之下衍生出嚟，不過Hasbro版本就刪除咗HT嘅星星叫（Starscream）大飛翼，改為喺膊頭加裝麥加登（Megatron）嘅火炮，以重火力形象示人，另有一番味道，文哥粉絲見到一定流口水。

展區：D11