Galaxy Tab S 6.6mm新鮮薄切

提起輕薄平板，十居其九想起iPad Air，但7.5mm你就覺得薄？閣下要求未免太低了吧！講薄，Samsung新鮮熱辣推出的Galaxy Tab S才是當中表表者，僅厚6.6mm，重量最輕亦只有294g，女仔拎上手都輕鬆到暈！最重要係佢有埋2K Super AMOLED屏幕，細緻兼還原度高。此平板7月4日正式發售，各位係時候諗轉會了！

8.4吋Wi-Fi版 $3,098、8.4吋LTE版 $4,098、10.5吋Wi-Fi版 $3,898、10.5吋LTE版 $4,898

正面看猶如放大了的Note 3，8.4吋型號僅闊125.6mm，單手拎剛剛好。

鈦金啡色別具金屬感，加埋點陣暗花，好高貴囉！

有圖為證，厚度僅及兩毫子硬幣一半！

一體成形設計，microSIM及記憶卡要從機側插入。

喇叭位於頂部及底部，橫置睇片時聲音更出，唔會畀手指擋住。

對應Multi Window，可邊睇波邊上網查波經。

指紋掃描器最多登記三組指紋，可用於解鎖或資料加密。

輕薄手感好

小記把Tab S 8.4帶回公司測試，同事玩過後第一個字必說︰「薄！」。薄係薄，但有幾薄先？間尺度出6.6mm；若拍埋iPad mini Retina一比，竟薄0.9mm之多，厲害！手感方面，不要以為薄一定鎅手，相反圓渾機框出奇地好手感，而且重心分布平均，即使長時間單手拎住，都唔怕手仔痠痛。值得一提的是它有鈦金啡色及珍珠白兩色選擇，同樣有金屬邊框點綴，實淨之餘仲好高貴呢！

靚絕2K屏幕

玩得平板，屏幕都係考慮因素。這方面Tab S無論是8.4吋或10.5吋型號，都採用了Super AMOLED面板，支援WQXGA（2,560×1,600）2K解像度。小記實測所見，屏幕雖略帶味精感覺，但輸出效果如印刷品咁靚，若與同廠用LCD芒的Tab Pro比較，更發覺Tab S畫面更光更細緻，顏色亦更為飽和鮮艷。廠方又指，Tab S支援90% Adobe RBG色域及Adaptive Display技術，前者可還原大部分三原色，影友「聞相」必備；而後者則能按環境自動調校色溫及光源，夜晚關燈煲劇，都唔怕整壞雙眼。

預訂送保護套

Tab S處理器採用自家製Exynos 5，由兩顆四核心組成，《AnTuTu》跑分雖不如頂級的Qualcomm S801平板，但實測操作其實絲毫唔慢，用來打大食遊戲如《FIFA 2014》更是全場保持流暢，機迷應該滿意。系統方面則使用Android 4.4，並支援多重視窗、孩童模式及Ultra-Power Saving Mode等多種「特異」功能。留意機面Home掣可如S5般變成指紋掃描器，最多儲存三組指紋，方便用戶鎖機或儲存資料之用。Tab S由即日起至7月3日接受預訂，7月4日發售，而首批預訂客戶可獲贈Book Cover保護套乙個，價值$399o架！