艷陽下睇波DoCoMo F-05F

世界盃開鑼，球迷們當然一秒都唔放過，明明睇完直播，日頭返工見有人Share精華片段都要撈埋汁，然而，若遇正猛烈陽光，屏幕反光就大為掃興！好彩近年手機屏幕愈出愈靚，好似新返DoCoMo水貨手機F-05F便坐擁5吋高清屏幕，並支援「WhiteMagic」技術，屏幕亮度達1,000流明，強光下畫面依然清晰，幾曬都睇得一清二楚！

$5,280

「My Magazine」定期追蹤日本新聞，哈日迷必看！

透過NX! Eco功能，用家可按喜好選擇慳電效果。

內置Health Diary，透過計步器評估用戶健康狀況。

提供英日詞典，輸入英文即看到日文解釋，讀緊日文的話好有用。

QWERTY鍵盤提供關鍵字及大細階選擇，打字得心應手。

機身設計與上代F-01F好似，同樣採用窄邊框來收窄偷位。

有懷舊、負片、黑白等多重濾鏡選擇，方便快速編輯相片。

機背設計簡約，香檳金色更經電鍍處理，望落高貴。

手機防水，SIM卡及microSD卡都有防水蓋。

厚10.4mm，唔算纖薄。

提供2,070萬像素鏡頭、LED燈及指紋識別器。

跟S5（下）比較，F-05F（上）較為明亮，但就稍嫌偏白，唔夠對手鮮艷。

高貴香檳金

來自日本的DoCoMo水貨手機，近年主要由Samsung、LG、Sony、Sharp及Fujitsu五間大廠代工生產，前三者在港向有行貨，吸引力不大；後兩者則只限日本國內發售，規格零舍勁，吸引力自然分外高。今次受測的F-05F正正是Fujitsu今夏機王，論纖薄，厚10.4mm的它絕對稱不上，但它卻坐擁流線弧形機身，加上機背特設指紋辨識器暨開關掣，單手操作便利之餘，仲冇得個薄字嘅卡片機咁鬼鎅手！另一要讚的是它有齊黑色、粉紅及香檳金三色，香檳金一款更經過電鍍處理，不留指紋兼望落高貴！

屏幕光過S5

日系手機一向是屏幕領導者，每間廠商皆有自家技術，Sharp有AQUOS，Sony有BRAIVA，而Fujitsu則有WhiteMagic屏幕技術；F-05F當然具備這技術，而且亮度更由F-01F時代的800流明提升至1,000流明。小記拿它與Galaxy S5比較，後者出名亮度十足，但拍埋一比還是輸F-05F一截，最誇張是F-05F仲可以開埋「Super Clear Mode」將亮度進一步加強，陽光底下清晰到暈！惟溫馨提示大家，屏幕始終有點刺眼，走入室內後建議校暗些，好讓雙眼看得舒服些，同時又收慳電之效。

支援香港4G

規格方面，此機搭載了Qualcomm Snapdragon 801 2.3GHz四核處理器、2GB RAM及32GB ROM，配套實屬頂級，《AnTuTu》跑分達到31,917分，跟S5、M8等機王相若。至於介面，用的是客製化的DoCoMo UI，提供五款主題布景及七款Wallpaper，並內置My Magazine及Slide Display功能，前者定期提供日本新聞，哈日迷必Like；後者則可將畫面整個向下拉，以方便手指較短的用戶單手操作。特別一提，此機還兼容香港的1,800MHz 4G網絡，網上睇波甚為流暢。