Robot魂龍神丸Ver.2
建議零售價：$599.9
作為玩具迷，有邊個唔知Bandai係全行最「環保」嘅公司，模型又好、完成品也好，總之同一個模，改少少色、換咗若干Parts，就可以當全新Version出多次，難免令人覺得氣憤。今期「Robot魂」推出嘅龍神丸Ver.2，卻走出呢個邪惡定律，成隻100%全新製作，仲追加咗三款特效Parts，就算閣下已經擁有Ver.1，都會覺得呢款Ver.2非買不可。
飛龍拳
膊頭做足金屬塗裝，龍紋仲係浮雕形式而非刻線算數，夠認真！
變番大頭仔，唔只順眼咗，塗裝又落足心機，頭盔與面位分別用咗金屬塗裝及珍珠色。
龍牙拳
膊頭與軀體都追加咗拉出式關節，大幅提升可動性。
炎龍拳
由於可動性大增，擺甫士就更見自然，氣勢返晒嚟！
飛雲Figure換咗新甫士，不過眼神始終女仔咗啲。
Mobile Suit Gundam 35th Gundam & Chars Zaku II Head（Premium Ver.）
售價：$430（未連運費，預計9月推出）
點解今次Bandai咁有誠意？原因好簡單，就係Ver.1嘅質素實在唔合格，用佢再出多次嘅話，相信廠方自己都覺得過唔到自己。雖然話Ver.1已經係2009年嘅產品，同依家嘅Robot魂相比，可玩性當然有所不及，不過Ver.1嘅最大問題係造型明顯走樣，《魔神英雄傳》嘅機設特色係頭大身細，身形向橫發展，不過Ver.1嘅頭部及軀幹都太窄、太瘦，整體比例變咗向上而非向橫，似BB高達多啲。
原著造型返晒嚟
龍神丸Ver.2就成功撥亂反正，頭部及軀幹都變橫、變肥咗，連帶手腳線條都變得圓渾晒，終於有番原裝動畫嘅神髓。至於可動性方面，相隔五年，當然有大改進，例如胸、腰、腹分成三段式設計，相互之間以拉出式關節連接，可以做到上下及左右唔同角度嘅拗腰動作；除此之外，上肢兩側與膊頭嘅連結部分用咗分割式設計，同樣以拉出式關節相連，大幅增加雙臂嘅活動幅度，尤其是擺到雙手向上持劍嘅招牌動作，比起Ver.1可以擺出更多甫士。
新增必殺技Parts
唔只造型、可動性都脫胎換骨，隨盒Parts都豐富過Ver.1，首先Ver.1嘅登龍劍及飛雲Figure，Ver.2又點會少，尤其是飛雲換上與Ver.1龍神丸，以及同系嘅龍王丸與龍星丸唔同嘅新甫士，增加新鮮感，造功與塗裝亦交足貨。最抵讚係Ver.2新增三款必殺技甫士，分別係有如波動拳嘅「炎龍拳」、貌似風火輪嘅「龍牙拳」，以及放飛箭嘅「飛龍拳」，基本上龍神丸最深入民心嘅必殺技，都差唔多喺Ver.2出番晒嚟，不過炎龍拳與龍牙拳嘅特效Parts，並非直接與手部連裝，而係要加Stand扮成出招形態，不過隨盒並非專用地台，換言之要玩家另購地台，廠方果然改不了「精打細算」嘅本色。
（c）サソライズ．R
查詢：2433 1828（瑞華行）
模型速報：高達35周年場景紀念模型
今年是《機動戰士高達》面世35周年，當然要隆重慶祝，Premium Bandai HK便將會推出結合不同比例而成的場景模型Boxset，在專用地台上既有RG的1/144 RX-78-2 Gundam，本體更用上金屬色塑料成形製作，旁邊還有U.C. HARD GRAPH的1/35 Zaku II頭像，不過由原來的MS-06F換成馬沙專用的MS-06S，加上地台正面的金屬貼紙，整體組合頗有當年劇場版的海報設計Feel。
網址：www.p-bandai.hk
Dick
