ItsImagical Paquito Mini篤得玩得啱好兒童

聽日就係兒童節，各位家長想應節買件益智又實用嘅禮物畀小朋友的話，呢部ItsImagical出品嘅Paquito Mini就至啱！佢係一部專為兒童而設嘅Android平板，不單有專屬介面，最正就係有一系列實體玩具，可以配合Apps玩，等小朋友復活節假期日子過得充實！

機身備有8吋屏幕，不過解像度一般，僅得1,024×768，顯示唔算好突出。$1,999

對外連接插頭一排過置於機頂，不過充電要用特定火牛而非USB線，稍為不便。

機面睇落似有三粒觸控鍵，實情中間Logo係裝飾而已，唔好篤錯。

後置鏡頭僅得200萬像素，影相唔好抱咁大期望。

機背用上紅色金屬物料，非常搶眼。

「Parental Control」可以控制小朋友可用嘅Apps及使用時間。

每個用戶都可以自訂Apps或Wallpaper，幾位小朋友都可以共用一機。

內置時間表等實用程式，可以畀小朋友學習計劃時間。

小朋友試拎，機身打橫用都啱啱好，不過就略嫌重咗啲。

實體玩具一覽
Puzzle 3.0配件
有四個不同形狀工具，只要印上屏幕就會顯示相關圖案。$359

Home Arcade配件
猶如一台迷你的街機，配合JoyStick及實體按鍵，玩遊戲時更就手。$799

Blocks 3.0配件
備有多顆英文字母、數字及圖案骰仔，內置感應器，小朋友要依據畫面的字母、數字放上機座配對。$499

西班牙著名童牌

可能好多人都唔知ItsImagical係乜來頭，查實佢係西班牙著名兒童產品大牌，已經有成廿年歷史，仲係全球規模數一數二嘅玩具零售商。近年興玩Gadgets，所以佢哋都整咗好幾部兒童專用嘅手機及平板，而新作就有呢部Paquito Mini。第一眼望落8吋機身確實同iPad Mini相似，其紅色機背配白色機面，十分搶眼，應該可以吸引到小朋友。唯一要彈就係機身用金屬物料，大人就會讚佢手感好，不過小朋友就可能會嫌佢425g嘅機身太重，長時間拎住怕且手仔會幾攰。

自家親子介面

外表就似iPad Mini，骨子裏卻係行緊Android；不過一睇介面，卻幾乎毫無Android影子！原來為咗切合小朋友及家長使用，廠商特別為Paquito Mini預載自家magicOS 2介面，最特別就係可以加入不同用戶，而家長亦都可以透過「Parental Control」，控制小朋友可以用嘅Apps，以及可登入嘅網頁，當然唔少得就係限定每日登入時間同埋使用時間，務求小朋友唔會沉迷。

好玩實體玩具

而此機戲肉就係兒童內容，佢預載咗《PaquitoLand》畀大家下載兒童Apps，除咗會喺Google Play精選出小朋友啱用嘅Apps外，仲有唔少係廠商自家出品，範圍涵蓋教育、音樂及書籍，由BB至12歲都啱。最特別係可另購i-wow系列實體玩具以配合Apps玩，比較過癮要數Blocks 3.0配件，佢有英文字母、數字及圖案骰仔，骰仔內置感應器，小朋友只要根據Apps畫面將字母、數字放番上機座配對就得，玩法比一般篤芒有趣得多，小朋友肯定唔放手！