我不去賭場賭錢，很久沒有玩啤牌和打麻將，但我不敢自稱不愛賭錢，因為我玩股票。

股票市場也許是另類賭場，叻到曉飛都不及消息靈通重要，但我不聽消息的，以免變成羊牯，為贏粒糖而咩咩咩（新年講好意頭，以羊咩聲代替好了）。

賭錢講運氣，可以贏錢的話，賭本不必多。近來最賭運氣的是抽新股，我不是隻隻都入紙抽，通常抽的都是超額認購多倍的。最近兩次都證明自己有少許財運，為免運氣用得太多，要暫停抽新股一陣子。

先前抽新股派到三千股，個個問我是否申請許多，我說認購六千股，獲派三千股，純粹好運，上市即沽，賺二千多元。

我有抽股史上超額認購最多的新股，透過經紀行買孖展抽籤，以我認購的股數，獲派一手的或然率大概百分之三，我抽到一手，上市即升一倍多，未賣，因為成本低，放三千元股票在戶口，看看最終升多少。

我對兩隻新股只有基本行業認識，見超額認購誇張，理應無得輸，不過是賭運氣，這樣的錢無理由不賺。

我認為正財比橫財重要，正派工作既可賺取薪金，又可回饋社會。橫財就不過是錢，即使有橫財即捐錢做善事，仍不及賺正財有意義。

趁大年初六，不如從俗：恭喜發財！發財立品！