雙卡Moto G多彩靚背

提起雙卡機，呢期紅米手機肯定最紅，佢機價超抵，不過買機要提早預約兼玩紅米F碼，又要限時上網鬥搶，搞到好多用家都怨聲載道！想買抵玩雙卡機原來仲有得揀，講緊嘅就係睽違嘅Motorola新作Moto G。雖然冇紅米咁平，但勝在大廠出品兼搭載四核心處理器及4.5吋靚芒等高規格；最重要係原廠已經有多色背殼任你換，零舍搶眼！

嫌原裝黑色背殼太悶，仲有六色背殼畀你揀。

除咗背殼外，尚有另一款摺合保護殼，有黑、玉石白、檸檬青、櫻桃紅、寶藍五色，可以同時保護埋機面。各$278

機面設計同Moto X有九成相似，不過屏幕就稍稍縮水至4.5吋。

機背殼加入磨沙處理，手感唔錯。

兩個SIM卡槽擺放於對角位置，支援microSIM細卡。

機背呈弧形，迎合用家手形，手持時更舒服。

可以拍攝出1/4×的慢動作影片，拍攝運動場面就啱晒。

只要於其他Android手機安裝《Motorola移轉》，新舊兩機經QR Code或NFC配對，即可將相片、聯絡人、通話紀錄等資料無線傳送至新機。

兩指喺狀態欄一拉即可顯示快捷設定清單，相當方便。

「雙SIM設定」提供簡單雙卡設定，清晰易用。

採用入門級四核心處理器，Benchmark得分僅得萬六分多啲，效能一般。

《Assist》可以設定手機於指定時段如晚上、會議時，自動開啟靜音或以SMS自動回覆來電者。

半圓形攝影介面易用，可惜500萬像素鏡頭成像一般。

細芒版Moto X

早前「Mo記」喺美國推出Moto X，大玩自由配色概念；今次Moto G雖然冇得任你配色，但都唔輸蝕；皆因背殼可以隨時更換，除咗跟機嘅黑色外，仲有玉石白、櫻桃紅、紫、寶藍、湖水綠及檸檬青等顏色畀你揀，每款都係$118，啱晒鍾意Colourful嘅用家。而外形方面，此機就同Moto X有九成相似，機身大小、設計以至弧形機背都同出一轍，只是屏幕由4.7吋稍稍縮細至4.5吋。不得不提的是，以平價手機來說，Moto G屏幕質素出奇地好，顏色鮮艷、亮度又高，用來睇片、睇相效果都非常正；加上採用Gorilla Glass 3玻璃，大大加強屏幕防刮能力，隨時芒貼都可以慳番！

系統稍後升級

規格方面，Moto G搭載入門級Qualcomm Snapdragon 400四核處理器以及1GB RAM，硬件中規中矩。最令用家擔心就係僅內置16GB容量，亦不支援外加記憶卡；幸好廠方隨機附送為期兩年嘅50GB Google Drive雲端儲存空間「補飛」，咁就唔使驚冇位擺歌同相片啦！軟件方面，Moto G預載接近原生嘅Android 4.3作業系統，花巧功能就欠奉，比較特別就要數到《Assist》以及《Motorola移轉》，前者可以設定手機於指定時段自動開啟靜音或以SMS自動回覆；後者則可將舊機以QR Code配對新機，將舊機內相片、聯絡人等資料無線傳送至新機，非常方便。值得留意，本港代理話明稍後時間就會推出Android 4.4 KitKat更新，保證有得玩最新軟件。

雙卡方便

其實Moto G早喺上年11月尾已經喺外國推出，當時亦有水貨抵港，豈料行貨版本同水貨功能竟然大有不同。原來港版引入嘅係外國少見嘅雙卡版本，撥號、傳短訊前都會彈出SIM卡選擇Menu；用家亦可以於「雙SIM設定」設定各上網、撥號預設使用嘅SIM卡，以及更換SIM卡訊號提示的顏色，整體用落都幾方便。美中不足是Moto G不支援雙通功能，換言之SIM 1通話時，SIM 2就接聽唔到來電，略嫌不便。