提起Transformers嘅玩具，攞正License嗰種喎，相信大家只會即時想到美廠Hasbro，或日廠Takara Tomy，但原來仲有港產品牌發威！期待已久、Kidslogic最新可動Figure系列「MechaNations」終於派台，頭炮上架就係博派司令柯柏文，採用品牌最擅長嘅Q版造型，加埋內置LED發光Gimmick，着晒燈擺甫士零舍有型，更令人感動就算機仔細細，但所有關節都採用齒輪榫位連接，點屈點扭都咁耐玩，呢份誠意，高過唔少日、美大廠！

Kidslogic MechaNations01
《The Transformers》Optimus Prime
建議零售價：$750

配件相當足料，既有一對開掌，仲有一隻握槍右手，以及手指指嘅左手，武器就有激光槍及光能斧各一件。

Matrix心臟嘅藍色透明核心，能夠透出胸部嘅LED光線，呈現經典嘅「開胸」一幕。

拆除拳頭之後，就可將Energon Axe直接套上，配合拍攝效果，令透明斧刃有如發光一樣。

頭頸部分多咗一小節可動機關，令大頭文都可抬起頭。

髖部及膝蓋嘅齒輪關節夠晒實淨，腳前掌仲可以獨立屈曲。

所有LED開關都融入於機體表面，令整體線條保持完整。

原創膊頭Logo着燈

呢款港產柯柏文嘅造型，參考元祖動畫「Generation 1」版本，由於以造型美行先，故此放棄咗掣肘多多嘅變形功能，就算變成Q版Look，形象依然魁梧有力，忠實展現文哥神髓。塗裝方面更加要讚完又Like，事關紅、藍主色都用咗金屬底色焗漆處理，令成個文哥閃令令，充滿質感，美中不足有輕微甩油，還好情況唔算嚴重，大家入貨時要睇真啲喇！Q版文哥另一賣點，在於體內藏有14枚LED發光噱頭，分別喺雙目、心口擋風玻璃周圍、Matrix心臟嘅嵌入位置、雙前掌，以及激光槍嘅炮口，都有唔同顏色嘅着燈效果，尤其是原創左邊膊頭嘅博派Logo都可以發光，而且亮度十足，So Cool！

可動性高關節實淨

除咗發光功能見功架，可動性同樣一絕，機仔細細都有22組關節，主要受力位置，例如頸部、肩膀、髖部、膝蓋都採用更耐玩嘅齒輪關節，扭動時會發出紮實嘅「咔咔」聲，令玩家可加倍放心，加上腳掌用咗獨立關節，有助增加接地性，就算「金雞獨立」都企得穩。附件方面，造型手掌備有開掌、握槍及手指指三款，武器唔只有激光槍，仲跟埋Energon Axe，加上專用底台座畀你擺跳躍甫士，相對建議零售價只係$750，除咗一個「抵」字，我諗唔到其他形容詞，除咗H記、T記，仲有B記等玩具大廠，應該會感到壓力啩！有競爭先有進步，做玩具如是、轉台追劇，甚至選特首都係，不過要「真」競爭囉，冇實力乜都假！

查詢：2751 9018（熱血童盟）