時尚潮流
  • EX合金小露寶
    建議零售價:$2,050

    「大踏步神情確威武,小子大名露寶,人人皆知道!」以上嘅《小露寶》歌詞,相信唔少70後仲會記得,甚至成隻歌都識唱,呢套港日動漫迷嘅集體回憶,唔經唔覺明年就到40周年,今年又係原作者石之森章太郎嘅75歲冥壽,ActionToys就搵嚟日本造型師炮製EX合金小露寶,Boxset跟埋變身用嘅車轆、螺旋槳及12款表情眼仔等豐富配件,原汁原味重現當年嘅搞笑一面。

    故障Look

    鹹濕Look

    暈眩Look

    小露寶最怕蟑螂,Boxset唔只有三隻小強,仲有小露寶被小強嚇親嘅「發癲眼」。

    黃色內盒設計,夠晒簡約經典,不過發泡膠所佔位置較多,略嫌大盒咗啲。

    橡膠軟喉手臂內藏兩組關節,金色手套上嘅拇指,亦可簡單扭動。

    隨盒附有兩種機械內構,一種備有插電線嘅駁口;另一種就係較為先進嘅電路,兩者由雕功以至塗裝都相當精細。

    貌似間尺嘅分數卡,小露寶經常用嚟檢視自己嘅分數,你又記唔記得?

    盒內備有12張心形靜電貼紙,就係鋼鐵老師用哋嚟做獎勵嘅禮物。

    機械小子烏龍百出

    70後對小露寶耳熟能詳,但係80後、90後可能只知佢係一個貌似舊式郵筒嘅機械人,對佢嘅故事出處所知無幾。其實小露寶係1974年嘅日系特攝劇集《小露寶》嘅主角,係一部家務機械人,入讀專門訓練機械人嘅學校,立志成為人類嘅好幫手,由鋼鐵老師做班主任,根據學生嘅能力特性,分配到唔同嘅人類家庭實習,小露寶就被大山一家收留,因為心急想得到鋼鐵老師嘅心心貼紙(同幼稚園印兔仔做獎勵類同),於是佢好落力幫大山一家解決疑難,可惜大懵撞板嘅性格,往往好心做壞事,最終要鋼鐵老師及成班朋友仔幫手收拾殘局,炮製咗唔少笑彈。

    配件豐富玩法多

    雖然係香港品牌,但EX合金小露寶並非全部「Made in Hong Kong」,始終日本人對小露寶認識最深,所以原型製作交由日本造型師佐藤和由操刀,紅色嘅圓碌碌頭部、水桶腰、四肢關節及腳掌,內部全部有Diecast,含「金」量極高,而且為咗營造特攝服飾嘅獨特質感,扭動手腳嘅橡膠喉管時,會有皺紋效果,加埋腳掌表面專登做到粗糙,充滿懷舊Feel。除此之外,Boxset備有12種眼神組件,由喜、怒、哀、樂以至色迷迷、暈眩、震驚、無力等表情都有齊,仲可以換件變身,重現接載大山新太郎嘅三輪車形態,以及優哉游哉嘅四輪車形態,兩款造型的車輪全部可以轉動,又可以揭開背部、裝上螺旋槳,連埋有金屬支架嘅專用展示台座,就可以穩陣擺出飛行甫士,咁多玩法,童年回憶仲唔即刻返晒嚟?

    查詢:2390 9843(ActionToys Ⅱ)

    Alfred