無反扮單反Sonyα3000

無反相機一直以細小和輕巧見稱，同時畫質又媲美單反。Sony新推出的α3000無反相機卻打破常規，外形設計竟似足俗稱「大機」的單反，莫非α3000又重又難用？其實佢屬於入門級別，實物原來又輕又細，最適合攝影初學者使用，讓他們熟習手感和操作，而其售價亦夠晒親民。

Sonyα3000 $3,490

從正面睇α3000跟八達通卡相差不遠，可見機身唔算大部。

備有0.2吋、20.1萬像素的電子觀景器，但不設眼部感應器。

作為無反相機，感光元件固然清楚可見，最重要是兼容所有E-Mount鏡頭。

轉盤上有多種曝光模式，進階的PASM、入門的高級自動等模式一應俱全。

機背只有一個操作轉盤和幾枚按鍵，簡單清晰唔複雜。

凸出的手柄採用仿皮物料，可以緊持機身之餘，拎上手亦具質感。

試相
使用色調分離濾鏡特效，數種突變的色彩取代漸變色階，製作出另類的色彩效果。

353g輕盈機身

個樣似單反，先入為主總覺得又大部又沉重，其實α3000尺寸的骰，正面只係大過張八達通卡少許，而機身淨重只有353g，女生單手拎都冇問題。再配合凸出的手柄，拎得牢固之餘又特別有手感。α3000備有0.2吋、20.1萬像素的電子觀景器，方便在烈日下取景，可惜不設眼部感應器，若要切換屏幕或觀景器就要靠機頂的切換鍵。此外也有內置閃光燈，亦可加建閃光燈補光。

對應E Mount鏡頭

α3000使用無反E Mount鏡頭，配備2,010萬像素感光元件，仲可以拍1,080p全高清片，無論影相同拍片都耍家，而最高感光度達ISO 16,000，無懼昏暗環境，還支援每秒3.5張的速度先決連拍模式，整體拍攝能力中規中矩。操作方面，作為入門級，當然不會太複雜，機頂設有模式轉盤，而背面則只有一個操作轉盤和幾個按鍵，輕輕鬆鬆即可上手。

11種濾鏡特效

在α3000的模式轉盤上，大家可以見到PASM、高級自動、全景等多種曝光模式，顧及入門用家和進階用家的需要。另內置多種濾鏡特效，例如大熱的玩具相機、色調分離、普普風等，合共11款。如果大家鍾意影人像，α3000內置的柔膚效果就最幫到手，能夠修飾人像臉部的瑕疵。而不少攝影初哥構圖時，都會將主體放在正中間，雖然萬無一失，惟欠缺美感，此機的自動取景模式就懂得用黃金分割法裁剪影像，助你改善構圖。