手機入彎 Galaxy Round

全高清、多核心、千萬像素鏡頭加指紋辨識，手機玩到冇嘢好玩，究竟仲可以有咩突破？Samsung就有新諗頭，一於將傳統平面方角嘅屏幕微微拗曲，推出全球首部彎曲屏幕手機Galaxy Round，勁貼手之餘仲噱頭爆棚！日前韓版水貨已到港，內置繁中介面，售$7,180，呢「Round」你又跟唔跟呢﹖

Galaxy Round $7,180

跟Note 3一樣搭載了5.7吋芒，並採用了TouchWiZ介面，最多提供七版首頁。

熄芒平放時，按壓機身右側，就會出現未接來電及時間等資料。

附送兩枚2,800mAh電池及一個外置叉電盒，帶齊出街就唔怕冇電。

跟盒另有入耳式耳機，仲送齊三款耳膠。

從低處看屏幕的弧度更誇張，機身右邊完全翹高了。

與Note 3（左）一樣用上仿皮革機背，鏡頭模組的擺位亦相同。

預載《Nate》程式，最啱哈韓迷緊貼韓國新聞。

對應Multi-Windows，可一邊睇《半澤直樹》，一邊辦公事。

不但內置中文介面，仲提供中文輸入法。

對應雙頻4G，令4G速度不怕變慢。

試片
播片流暢，而且色水頗準確，沒有AMOLED向來予人的味精感。

彎曲手機唔係新鮮事，早在1996年Nokia就出過「蕉王」8110，然而佢只係機身彎曲，屏幕依舊係平面方角。今次Galaxy Round最爆之處，在於全機採用了Round Design技術，由機身到5.7吋屏幕均向內微微彎曲；雖然不算誇張，但外觀已經好突破，小記帶回公司即引來同事們嘖嘖稱奇，爭住試玩。據知這設計還符合人體工學，摸上手不但比一般手機貼手，煲粥時更有種耳窩被包圍嘅感覺，減少漏音問題。

搖搖板操作

屏幕彎曲，另一好處是手機可如「搖搖板」般彈吓彈吓，小記呢啲手痕友當然過足手癮，但唔講唔知原來還有實際用途。例如屏幕關閉時，壓住手機右側機身一秒左右，就會出現Roll Effect介面以顯示時間、未接來電及剩餘電量等訊息；又例如睇相時往左或往右傾，則可打開相簿清單，毋須跳到上一層重揀咁麻煩！值得一提的還有音樂操控，熄芒聽歌時只要撳一撳左右兩邊，即可回播或跳到下一首，連芒都唔使着，至啱大懶蟲！

完全中文化

彎芒夠Gimmick，但實際規格又如何？簡單來說，此機可謂由Galaxy Note 3倒模而來，有齊2.3GHz四核心處理器、3GB RAM及32GB ROM等頂級配置，並支援1,300萬像素鏡頭及4K UHD超高清拍攝，影相質素有保證。另外，一如最近到港的韓國水機，它兼容1,800MHz及2,600MHz雙頻4G網絡，並提供原生繁中及簡中介面，加埋中文輸入法，奄尖嘅本地用家實冇投訴！