查實半人半機械嘅BF-37芬奇將軍（General Franky），佢嘅人形同坦克形態，之前已經喺《超合金》系列出過，今次仲轉投超合金魂懷抱，令唔少粉絲跌晒眼鏡。新上架嘅超合金魂GX-63係由芬奇駕駛嘅Black Rhino FR-U Unit 4，同埋索柏嘅Brachio Tank Unit 5合體而成，特徵係水桶腰、香雞腳，咁都企得穩？唔使擔心，因為下半身用咗大量合金組件，唔使支撐架都企到，仲可以跟足原著擺浮誇甫士，令粉絲過足癮！

超合金魂GX-63 General Franky
建議零售價：$2,399

由於下半身以合金製成，擺浮誇演嘢甫士都企得穩。

漫畫中General Franky嘅絕招係打開心口艙門，芬奇本人就响駕駛室伸個頭出嚟，施展芬奇大炮及芬奇火球。

每隻手指都有三至四節可動關節，可以擺出多款手勢。

膊頭設有延伸關節，手肘嘅雙關節又內藏齒輪，扭得多都唔怕鬆。

說明書之外仲有特刊小冊子《新世界Graph》，大講General Franky嘅設定資料。

General Franky可以分體成由索柏駕駛嘅Brachio Tank Unit 5（上），以及芬奇嘅Black Rhino FR-U Unit 4。

唯一外掛武器係芬奇劍，重現General Franky喺魚人島時嘅英姿。

附上駕駛員索柏（左）及芬奇Figure，賣相一流，可惜零可動性。

話說喺《One Piece》第一部終章「頂上決戰篇」後，海賊團路飛等人經歷咗兩年修行，去到第二部《新世界篇》時，個個嘅實力都有大幅增長，當中芬奇更自我改造成半人半機械，仲幫千陽號嘅船艙武器庫追加新兵器，利用記憶合金「瓦波金屬」製成電單車Black Rhino FR-U Unit 4，以及坦克Brachio Tank Unit 5，仲可以合體成鋼鐵海賊General Franky。General Franky首度出現於魚人島和龐克危地，曾經拔出掠奪者之劍「芬奇劍」，斬殺多名海賊，仲打開埋心口艙門使出「芬奇大炮」及「芬奇火球」等必殺技。

上輕下重唔怕跌

General Franky本身造型浮誇，身體、手腳比例亂晒龍，好似酒桶咁大個嘅胸連腰，電鑽飛機頭就做到細細粒；膊頭、前臂水桶咁粗，但係上臂、雙腳就筷子咁幼，相信好多玩具迷都擔心佢是否企得穩？筆者玩過實物後，發現雙腿連關節全部都由合金製成，就連髖關節都唔例外，對比起以膠件為主嘅上半身，做到上輕下重，唔怪得任擺甫士都企得穩。至於雙手採用塑料製成，肩、肘等受力位內置齒輪，避免受力不足嘅問題出現，而且膊頭可以向前傾，藉此做到雙手揸劍嘅動作。

分體維妙維肖

超合金魂General Franky嘅另一噱頭，就係可以分體成電單車Black Rhino FR-U Unit 4及坦克Brachio Tank Unit 5，後者由本體及雙腳構成，先將連接膊頭關節收好，再將背部嘅履帶拉前至腰側，揭開胸甲將頭部扭入並轉出大炮，最後屈埋對腳就搞掂，過程簡單；至於靠雙手結合而成嘅電單車，就要靠外加犀牛車架先變到身，電單車前輪由前腕拉出扣環裝嵌變成，球狀肩部就充當後輪。最正係隨盒附有駕駛員芬奇和索柏Figure，塗裝細心，表情又趣怪，放入車內分外入戲，唯一要彈係Figure不設可動關節，甫士只得一個，玩得耐難免嫌悶。

© EIICHIRO ODA/SHUEISHA．TOEI ANIMATION　

查詢：2433 1828（瑞華行）