Xperia C慳錢5吋大芒

平價大芒機近年喺手機界成功殺出新血路，惟機款多屬內地甚或山寨廠出品，始終信心不大！Sony近來新作Xperia C用5吋芒及四核心處理器，規格唔差；睇埋價錢仲驚訝，竟然$2,500有找！大廠出品加靚仔，點計都完勝山寨機，絕對係近期入門慳家之選！

有個5吋大芒，兼用上招牌OmniBalance設計，外形似足貴價機。$2,498

兜形的機殼設計，要花啲工夫先拆到。

實體快門鍵方便Snap，半按對焦反應亦好快。

喇叭設在機背底，聲量相當大。

兩卡均採用microSIM，不過就要拆電先換到。

機面底部設有LED燈，來電、充電、聽歌時都會着。

MTK四核處理器行Benchmark得分一般，同舊款HTC One X差唔多。

拉下狀態欄即可隨時切換主卡，直接方便。

內置Small Apps，按Recent App鍵即可隨時開啟便條、錄音等小工具。

「自拍聲音指引」要先揀定合照人數，之後手機就會因應位置而作出語音提示。

《繪圖》App可以畀你發揮創意，亂加亂整，十足貼紙相。

平衡設計手感正

講設計日系手機向來有一手，Sony更加可以話係龍頭，早前Xperia Z、Xperia Z1齋賣樣已經秒殺唔少用家！新機Xperia C雖然定位係入門級，不過都繼續用上前兩者嘅招牌OmniBalance「全方位平衡」設計，機身上下左右及邊框都幾乎對稱，感覺勻稱好舒服。而其屏幕有5吋大，睇片、上網視覺上好鬆動；要扣分就係屏幕解像度只有960×540，不夠細緻，幸好顯示顏色都尚算鮮艷和準確，都算合格！值得一提是背殼採用磨沙物料，夠啜手，目前到港就只有黑白兩色，如果日後有埋紫色就更好。

聲音指引自拍

一般入門手機攝影功能都普通料，反觀Xperia C就唔同，單睇800萬像素鏡頭唔算突出，不過就支援全高清影片、全景、場景模式等設定，基本拍攝功能足料。機側亦備有實體快門鍵，長按即可開啟相機，半按又可以對焦，Snap超方便。最搞鬼就係新增「自拍聲音指引」，揀好自拍人數之後，再用後鏡頭影相時就懂自動辨識拍攝對象位置兼有靚聲「導航」，提你「鏡頭移左啲、再移左啲」、「請對準鏡頭」等，啱位就會有女聲講「OK！123笑」。筆者用過，覺得提示準確，以後自拍位置唔使估估吓。

入門四核冇Lag機

此機規格算係咁，搭載入門級1.2GHz四核心處理器，雖然只屬台廠MTK出品，效能以至Benchmark得分都比大廠Qualcomm處理器弱，但實測操作及開Apps都尚算流暢，快速換頁都冇Lag機。此外亦支援雙卡雙待，除了內置「雙SIM卡」設定主卡外，隨時拉下狀態欄亦可切換主卡，啱晒中港兩邊走嘅朋友。介面方面，沿用Android 4.2系統，操作與Xperia Z、Z Ultra等相若，比較特別是內置《繪圖》App，可以當畫板畫畫，亦可以將相片加入卡通整色整水，玩味十足。