NBA今個月尾就開鑼，焦點除咗落喺Derrick Rose傷愈復出，以及大帝James能否三連霸外，仲有入樽狂人Blake Griffin又會有咩誇張招式引起哄動？雖然佢早前受咗傷，未必打到開季賽事，但即將別開生面，搶閘喺球季開鑼前同大家見面，就係Enterbay最新推出、明日首賣嘅1/6 Action Figure版本，隨盒跟埋磁石波、入樽手掌及招牌O嘴表情，令粉絲可以喺屋企重現Griffin鋤爆籃球框嘅激動一幕！

售價︰$1,588

新NBA-BG素體有成13"高，身形分外魁梧。

白色護肘富彈性，唔會阻礙麒麟臂伸展。

隨盒備有Chok樣及O嘴兩款頭雕，同樣似足真人。

球衣設計跟足實物，隊徽、人名等位置以及大小都似層層。

Spalding磁石籃球，對應磁石手掌，單手拎起都絕對穩陣。

包裝盒印咗簽名字樣，球迷見到分外有Feel。

鞋款似足Griffin依家着緊嘅Super.Fly 2，但因版權所限，Jumpman Logo冇得落。

膝頭設有雙關節，屈膝角度特別大。

雅蘭中心舉辦NBA珍藏展覽之餘，仲會Set埋EB嘅限定Pop-Up Store，明日首賣Griffin Figure之餘，仲有同廠NBA Figure嘅情景展出。

鋤樽頭雕　生鬼傳神

Griffin嘅試辦頭雕，筆者早前已經喺EB主腦Bill爺嘅微博睇過，神似度爆燈，今次睇大貨實物，都Keep到九成水準，由Scuderia落刀、YJ上色兼監修，基本上五官輪廓、鬚根及膚色都似足真人，加埋招牌八字眼及栗子頭，極為Human-being，稍嫌「正常Look」嘅表情太過木訥。跟盒仲加多個O嘴「鋤樽Look」頭雕，雖然就咁睇有啲似冇牙阿伯，初時感覺幾搞笑，但係配合素體動作就夠晒傳神，尤其是擺「掛爐鴨」甫士就Fit晒，即時令人諗起真人嘅招牌入樽場面。

全新素體　大動作任擺

玩得Griffin，動作唔大唔擺，廠方為此特別開發全新嘅NBA-BG素體，不但跟足真人比例，有成13"高，關節數目仲多達40個，當中膝頭就用咗類似MG高達模型嘅雙重關節，雖然外觀比唔上包膠Body，但係屈膝動作就更自然、角度亦更大，現時嘅包膠Body就絕對做唔到。服飾方面，身穿嘅係去季Clippers背心型作客球衣，並非新球季嘅短袖款式，還好剪裁尚算不俗，NBA標誌及隊徽都做得夠細緻，至於腳上嘅疑似飛人牌波鞋，雖然飛走咗品牌Logo，不過由雕工到塗裝，都似足Griffin本人愛用嘅Super.Fly 2，令球迷更有投入感。可惜除此以外，隨盒就只剩一個Spalding磁石波畀你玩，唔似得James又有Headband又有獎盃，配件方面似乎削咗啲喎，跟多套主場波衫都好吖！

明日雅蘭首賣

EB近期動作多多，除咗將高清人偶技術擴展至1/4類別，仲用天價攞到NBA「拉臣」，推出神級球星Figure，代表作Michael Jordan至今已經賣出四萬幾套，令平時較少接觸玩具嘅籃球迷都相繼入坑。繼Kobe Bryant及Lebron James後，今次介紹嘅1/6 Griffin就將於明日起喺位於雅蘭中心嘅期間限定Pop-Up Store作首賣，球迷記得請定假入貨，順帶一提，Derrick Rose嘅EB Figure亦將於下月緊接推出，公牛迷要儲定錢喇！

查詢︰

2332 3615（Enterbay）