Toshiba Satellite C50t-A 15.6吋靚芒家庭樂

相信不少畢業生都陸續搵到工！識賺錢，除了畀家用外，當然要買份實用禮物送畀一直默默支持你的家人吧。送電腦係大路之選，Toshiba最近有部C50t-A，配備15.6吋高清靚芒，屋企人煲劇睇片畫面夠靚，加上有個觸控屏幕，媽咪拎入廚房睇住食譜煮餸時唔使用Mouse；而售價亦相當親民，最啱Budget Buy！

$5,999

銀色機身設計簡約時尚，如果有多色選擇就更好。

鍵盤按鍵回彈力不俗，長時間打字都算舒服。

Touchpad大小適中，靈敏度不錯。

連接介面齊全，HDMI端子可接上電視作高清輸出。

只得DVD碟機，睇唔到Blu-ray，不過勝在有Resolution+技術谷靚畫質。

觸控屏幕可方便唔太識用輸入法的媽咪，唔使外置手寫版都可以寫字。

Toshiba Media Player除了可以串流網絡上的影片外，更可以接上手機及平板電腦播放其儲存內容。

試片
人物同物件顏色都層次分明，看起來感覺柔和舒適；加上屏幕亮度足夠，所以暗位細節表現合格。

高清娛樂配置多

波馬開鑼，阿爸成日擔櫈仔霸電視，細佬妹想睇劇集惟有遷就用電腦。幸好15.6吋芒的C50t-A就載有Resolution+東芝超解像高清技術，可將480p質素影像轉換到接近720p或1,080i高清顯示，有效提高畫面銳利度及令色彩加倍鮮艷，質素聲稱拍得住Toshiba自家電視機；加上擁有Toshiba Media Player內置程式，一Click就可以輕鬆串流網絡及雲端硬碟上的影片，連結方便；而且提供HDMI輸出，可將高清影片連接大顯示屏播放，家人包保冇投訴。