Snapshot鏡 日本漫遊
日圓跌落「正常」水位，吸引唔少人想去日本旅行。影相係旅遊的重要一環，畢竟日本的風景較有特色，唔影就係你嘅損失，雖則去旅行都建議大家帶備天涯鏡輕裝上路，不過其實俗稱Snapshot鏡的35mm定焦鏡頭仲好用，皆因呢類鏡頭普遍光圈大、成像力高，優點多籮籮，不過影近嘢就要行近啲囉。
$3,990
若然在街上遇到可愛的柴犬，一般只會選擇遠遠拍攝，難以營造淺景深效果。
只要走得更近，正面拍攝大頭狗，你會發現大光圈的魅力。
其實Snapshot鏡的近拍能力也不錯，不妨用盡最近對焦距離拍攝細物，前清後朦顯而易見。
幸好日本鬧市燈火通明，全開光圈手持夜拍絕對不成問題，惟有機會因為反差太大，顧及到光位時暗位細節隨之盡失。
於室內或者夜拍時盡開F1.8光圈、ISO 800，仍然可保持1/40s安全快門，影像不會鬆郁朦。
即使唔玩透視感由正面拍攝，鏡頭亦沒有嚴重的畸變問題，邊線幾乎筆直。
雖然Snapshot鏡無法像廣角鏡般營造誇張的透視感，不過前大後小依然可以做到。
使用Snapshot鏡最有趣的地方是需要不斷走前走後，從而訓練構圖技巧。
Olympus M.Zuiko Digital 17mm F1.8
話明係輕裝上路，最好當然帶畫質和便攜性兼備的無反相機，今次小記就揀咗Olympus PEN E-P5，而隨行的正是Olympus M.Zuiko Digital 17mm F1.8。千祈唔好以為此鏡頭係廣角鏡，由於Micro 4/3的轉換倍率為兩倍，故此鏡頭焦距需要乘二，換言之相等於135格式的34mm焦距，是一支不折不扣的Snapshot鏡，抓拍絕無閃失。鏡頭的近攝距離僅有25cm，縱然微距拍攝並非強項，但影人像絕對勝任有餘，加上僅重120g，就算連埋部機掛上頸都唔覺重。
近攝玩淺景深
介紹完鏡頭後，就要講講支鏡頭可以點玩，首先一定要善用大光圈嘅優勢，最好當然係玩淺景深，不過17mm F1.8鏡頭欠缺壓縮感，若要玩淺景深就必須走得更近更前。就例如小記在日本街頭巧遇柴犬，一般只會離遠拍攝，不過小記就大膽走到面前拍攝（按：當然最好先徵得主人同意啦！），反而會容易拍到超淺景深的大頭相。講到尾最緊要有耐性，皆因小記影咗成十分鐘先有一張滿意的作品，唔知係隻柴犬怕醜抑或唔喜歡影相，經常迴避鏡頭。
手持夜攝免腳架
若然大家參加攝影旅行團，就建議大家帶備一支腳架，不過今次堅持以輕裝為原則，腳架還是安置在家中吧。不帶腳架，在室內或拍攝夜景就需要手持拍攝，呢種場合大多數會谷ISO，別忘記17mm F1.8最大的武器就是備有大光圈，大光圈除了玩淺景深之外，亦可以應付低光環境，只要開盡F1.8光圈，再配合ISO 800~1,600的感光度，絕對可符合安全快門的要求，亦即是1/40s或以上快門速度。幸好日本市中心夠繁華，四周滿是了五光十色的廣告牌，測光會傾向較高的數值，手持拍攝毫無難度。
不變形的透視感
雖然「Snapshot鏡」好似高不成、低不就，焦距夾在超廣角鏡和標準鏡中間，影大環境要退後幾步，影近嘢又要行前幾步。不過用Snapshot鏡拍攝可謂瓣瓣掂，就算拍攝相同的環境，斜斜哋影又或者由下而上影，就能夠拍出前大後小的透視感，雖不及廣角鏡營造得那麼誇張，但亦頗為接近人眼。若然正面拍攝，Snapshot鏡又不會出現嚴重的桶狀變形，故此隨手舉機就能拍攝不錯的相片，問題係你是否願意多走幾步。
查詢：2376 2150
