Q版貓太郎 重出江湖
諗番90年代初，曾經興過一輪Q版動畫熱潮，當中包括《機甲武士劍》及《功夫貓黨》等，輪住喺晏晝五點半播放，諗諗吓都好掛住呢班老友記。港產Action Toys嘅「ES合金」系列，就密密出招幫我哋Call Back集體回憶，最近就輪到《功夫貓黨》嘅忍者貓太郎，跟足動畫頭大身細，又可以合體，而且呢款玩具只有港版「拉臣」，搞到貨源緊張，各位Kidult入貨要早！
跟足原著 表情多多
大家仲記唔記得太郎係點樣掩飾忍者身份？佢同十郎及寶寶平日喺薄餅店打工送外賣，當敵人烏鴉一族來犯，佢哋三個就會由薄餅店屋頂嘅炮管彈射而出，劇情走搞笑路線，太郎嘅口頭禪：「可怒也！」更加深入民心。ES合金就從表情嘅神似度着手，炮製咗三種眼神、四款嘴臉，組裝出豐富多變嘅面容。另外，由於裝甲形態時嘅巨形肩甲會阻礙頭部轉動，設計師就喺頭頸之間加入縱向延伸關節，稍稍拉長條頸部即可擰頭。不過整體合金量唔少，只係喺胸甲跟受力關節用咗Die-cast，好彩塗裝出色搭夠。武器方面就有雙刀和一枚飛鏢，留意擺出雙刀架式時，需要拆除劍柄末端換成刀刃。
合體有型 可動不足
筆者仲記得當未有大型機械人「貓神金鋼」幫手前，太郎等人面對強敵時，就要靠召喚神獸，合體成裝甲形態，ES合金亦都做埋神獸出嚟，並可實現完全合體，過程仲好簡單，首先將神獸雙爪直接套喺太郎雙腳，再將背部懸掛嘅腕甲，套喺太郎前臂，然後拆走太郎紅色背包，再裝上巨型肩甲，跟住套埋胸甲及頭冠，最後將剩餘嘅神獸部分摺疊裝喺背部，咁就大功告成。有型還有型，合體後嘅太郎比較笨重，下盤又幾乎零可動，而且換成面罩Look又唔係幾好睇，還幸咁大件都企得穩，榫位又實淨，唔會一邊玩、一邊甩件，都算收貨啦！
查詢：2390 9843（Action Toys Ⅱ）
訂購價：$398
擺出雙刀甫士時，緊記要先拆除劍柄末端。
想擺擲飛鏢甫士，本應要跳起先夠自然，可惜EX合金嘅雙腳幾乎零可動。
拆開頭盔，就見到頭頸之間有縱向延伸關節，可以拉長頸部調整頭部角度。
手臂雖短，但肘位都設有單關節，肩膀部分更有獨立Ball Joint。
隨盒有豐富嘅面相組件，可以組裝出發牢騷、享受Look以及正經Mode等招牌表情。
神獸雙翼、雙爪、嘴巴及頸部都有可動關節，並非零可動擺設。
戴咗面罩，個樣反而有啲死板，而且眼罩又冇發光Gimmick，都係唔戴型仔啲。
神獸結合成背包後，原本會令太郎企唔穩，不過隨盒有白色支架氖承托之用。
忍者貓隊另外兩位主角—寶寶（左）及十郎（右）同樣人氣十足，未知廠方會否繼太郎之後添食呢？