台北直擊： 一步一驚心《The Last of Us》全球首試

《GTA V》啱啱公布由原先預計嘅五月延期到九月中先至推出，上半年豈非冇超大型遊戲登場？咁又未必，上年六月E3橫掃多個權威網站「最佳E3遊戲」獎項嘅《The Last of Us》就會在五月七日推出。早前SCE安排遊戲的開發團隊趁住台北電玩展2013訪台，兼搞咗全球第一個試玩會，畀亞洲傳媒率先試玩，遊戲無論光源處理、音樂以至一步一驚心的驚慄感覺都係最上乘！而另外兩款今年內發售嘅PS Vita遊戲《Tearaway》同《Killzone Mercenary》都同樣有得試，兼有得同製作人交流添！

PS Vita：《Tearaway》紙板公仔新奇有趣

平台：PSV

推出日期：待定

這隻遊戲係由《LittleBigPlanet》團隊開發，係好啱一家大細玩嘅Casual Game。本作係玩「紙」，男信差主角Iota同埋今次公布的女信差主角Atoi都係用紙造，連場景、怪物都係用紙摺，玩玩吓仲可以應用PS Vita機身前後的觸控板玩撕紙、篤紙，向收音咪位吹氣仲可以吹走紙張，玩法既多元化又有趣。今次試玩Sogport小島的一版，玩落都幾過癮，好似要將主角縮成球狀「轆」過圍欄同逃避怪物追捕，又要將波子擲向標靶觸發紙機關困住怪物，而且仲可沿紙牆上的膠紙跡「轆」向高處。開發小組話如果乜都唔理快「轆」版過版的話，六至八小時都玩得完；但係遊戲支線故事甚多，甚至乎可以將遊戲內的角色送上雲端儲存再打印出來成紙板玩具，火速玩完就嘥晒開發小組一番心機喇。

PS3：《The Last of Us》新女角Tess或有陰謀

平台：PS3

推出日期：5月7日

三款有得畀亞洲傳媒試玩的遊戲當中，牌面上係由《Uncharted》系列開發小組Naughty Dog主理的《The Last of Us》為最強。上年九月東京遊戲展時都只係由製作人示範一段男主角Joel帶住14歲少女Ellie逃出瘟疫隔離區，而今次傳媒試玩嘅係新版圖「The Outskirts」，仲加埋謎樣新女角Tess一齊走難。雖然唔可以操控Tess，不過佢唔似得Ellie咁全無實際用途，喺緊急時候會出手幫助Joel。不過製作人就唔肯講Tess係正定係邪，有冇陰謀就要玩落去先知！

彈藥有限 自製武器

遊戲之前公布過有隻成臉核突腫瘤兼冇眼嘅受感染人類Clicker，佢單靠回音去辨別方向，玩家可以亂掟物件引導佢哋去特定位置。今次喺「The Outskirts」版圖入面，就有隻有眼嘅Runner，佢哋鍾意聯群結隊，畀佢哋其中一個發現，就會成班衝過嚟咬你。筆者就在一揪四隻Runner時死咗三次先過到版。不過製作人話遊戲唔係強調打「喪屍」，而係想營造出危難時的真實感，同埋生死存亡之際嘅人性表現。彈藥方面，亦非用之不盡，要靠現場執物品組合成武器，筆者試玩時就執咗好多鉸剪同膠紙備用。

光源表現 一流水準

製作人提醒傳媒試玩時，要留意遊戲的光源處理同埋水花的處理，話呢套好像真嘅實時光源處理系統，係第一次應用在遊戲之上云云。試玩時確實無令人失望，電筒光源散射同眩光表現都好真實，電筒光度更會愈用愈弱；筆者更試過將Joel企喺漏水的水管下，水花打在身上反彈的感覺亦好真。另外抵讚係遊戲的驚慄氣氛做得好好，尤其音效由靜止到「喪屍」即將現身時突然變得緊湊，聽聲都足可令玩家腎上腺素飆升，開發小組話係從幾年前高安兄弟的得獎電影《No Country for Old Men》（二百萬奪命奇案）中得到啟發，難怪成隻遊戲都好重電影感！

《Killzone Mercenary》Van-guard道具扭轉形勢

平台：PSV

推出日期：9月17日

可能有玩家會懷疑喺PS Vita玩射擊遊戲會唔會差過家用機好多呢？試玩完今年九月登陸PS Vita嘅《Killzone Mercenary》後，筆者可以話畀大家知：「唔會」。開發小組話此作介乎家用版《Killzone》第二代同第三代之間，用番家用版遊戲引擎，配合埋PS Vita嘅機能，同家用版表現都幾接近。今集主角變成一位僱傭兵，靠賺錢買武器裝備，而且單人故事模式同四對四多人模式入面嘅錢係互用。試玩當日，玩過三對三多人戰同單打模式，都打得幾刺激，近距離仲可用手指在屏幕畫線玩「行刑」刺殺，捽機背又可將狙擊槍瞄準器拉近拉遠；不過講到最特別都係專登為今集開發嘅Van-guard道具，可發射熱量監測導彈上半空掃描敵人藏身位置，或者遙控無人飛機從後突襲，而遊戲更會收錄八款Van-guard道具畀大家玩添！