Cutie熊貓園

上星期到山頂工作，返落中環搭船過海，途經ifc中庭附近，見到人人都拎起手機、相機咁衝晒埋去，以為發生咩事，原來商場為新年搭咗個「大熊貓豐竹園」，有成廿幾隻大熊貓，隻隻都做到真嘅一樣，難怪吸引大家爭相影相。商場之所以布置熊貓園，是取其大展「熊」圖、豐衣「竹」食之意，完全食正新年Feel。Panda隻隻都造型不同，Cute到爆！可惜當時只得我一個人，真係好難走埋熊貓隔籬自拍o架嘛，惟有用手機影低佢哋留個念啦！鍾意熊貓嘅話，真係要去探吓佢哋喇！我都約埋班Friend去多次先得！

Sammie H Reporter

新派大戲放笑彈

早前睇新派粵劇《一夢南柯》，未入場先見他們將北區大會堂的地下變身「開放化妝間」，眾人的衣箱勁Vintage，可以現場睇佢哋化妝Set頭真係大開眼界！言歸正傳，呢套劇係粵劇版的《仲夏夜之夢》，搞到我都好期待究竟粵劇可以點玩法。開段小生花旦都是正經地唱曲，但沒多久開始加入笑料，胖男反串王后大跳「馬來亞春色綠野景致艷雅……」全場笑破肚皮；中段講到兩男爭一女，花旦高呼「你呃人！你講大話！」簡直拍案叫絕！最後還要齊跳「給我一個吻，可以不可以……」，全劇不失傳統精髓卻有新意思，估唔到粵劇都可以咁玩法，正！

Mary K Reporter

贈品都有筍嘢

自從婚後，四處張羅特色利是封已成為例行公事，因希望每位收到本人利是的朋友，都會額外開心。不過去年有小朋友後，已失去Shopping時間，連帶利是封都無時間買，故今年決定用贈品頂替，加上MCP新都城中心免費換領的利是封又真係幾鬼靚，以雷射裁切技術，勾畫出花蝶圖案，配以燙金印刷，夠晒瑰麗，正！

Lum Reporter

Raw味木頭車

總以為寫明免費參加的工作坊、講座等都會好快額滿，無動力報名，今次應好友邀請試一次，想不到又報得成。講的是早前K11的工作坊「Hitching a ride-Trach Wood Creation」，由本地藝術家王天仁親自教授，把切割好的廢木板砌成車仔，沒有學過木工的我們，拎着錘仔、鑽批玩得不亦樂乎！不小心揼錯釘，要舉手求救，天仁前來手起錘落即刻搞番掂，好厲害！最記得是當我想退回有撻黑印的木板時，對面的同學仔大叫：「嘩！這塊好靚！」然後用他手上較白滑的一塊跟我交換；今次好玩之餘，還上了一堂環保課，正如天仁所說，原木一定有瑕疵，就是要懂得欣賞那份天然Raw味……同時欣賞自己手工的缺陷美！

P.S. 本人完全不懂繪畫，這幅太陽圖是送給好友的女兒，如雲上太陽般美麗！

Yuk Reporter

再換Hello Kitty

屋企樓下有間7-11，是每天放工後的好去處—食消夜、買嘢飲或買包薯片送電視，為疲勞身心帶來一點慰藉。常常買，留意到7-11常推出用印花換公仔的活動，如Hello Kitty甜品系列第二階段換領已開始，加入12款糖果系列公仔，有她的波板糖、Kerokerokeroppi吹波糖及Little Twin Stars星星糖等；每款公仔擺設都是一個小盒子，可用作收藏日常小物，都幾吸引。2月19日前還可到其Facebook Fan Page參加大抽獎。粉絲還不快快行動？﹗