拉斯維加斯CES直擊 手機 平板鬥芒大

NoteⅡ的成功，證明只要設計得宜，大屏幕Gadget一樣有價有市。今年美國國際消費電子產品展覽（CES），各大廠商就明顯向「三粒星」取經，無論是智能手機抑或平板電腦都愛鬥大，先有6.1吋Huawei Ascend Mate火併5.5吋ZTE Grand S LTE；再來有Panasonic破紀錄地發表20吋超巨型4K平板，將用家的觸感和觀感無限放大！

國產齊出大芒機

Samsung、Nokia今年都冇新手機發表，造就Huawei及ZTE兩個內地品牌成為全場焦點。以往手機屏幕若有5吋已經很誇張，Huawei卻叫我們更驚訝，旗下Ascend Mate的IPS+屏幕足有6.1吋之大，拍埋iPhone 5一比，簡直係大成個碼！屏幕巨大，續航力卻唔低，內置的1.5GHz K3V2四核心處理器出名慳電，配合4,050mAH大容積電池，保證有排用。至於ZTE則推出Grand S LTE，屏幕亦有5吋，而且解像度達到1,080p，比720p的Ascend Mate更勝一籌；最重要是它僅厚6.9mm，堪稱同級中最薄！

4K平板 尺寸稱冠

今年CES各大廠商都力推4K電視，估唔到Panasonic還把這技術擴展到Tablet PC，發表全球最大、屏幕足有20吋之巨的4K平板，其解像度足有3,840×2,560。現場所見，不但對比度及細緻度極高，還對應十點觸控，在Core i5處理器下完全唔窒，期望能盡快量產啦！另外，今年Gamer平板亦有一番熱鬥，當中Razer Edge就提供鍵盤、遙控及嵌入式手掣等配件，方便玩不同遊戲；而Archos的GamePad則在機側兩旁特設遊戲按鍵，驟眼看猶如PS Vita一樣！

同場加映：PMA＠CES睇相機：Fujifilm X100S及X20撐場

至於攝影產品則雲集PMA＠CES會場，同往年一樣，比較落力仍然係Fujifilm，去年在CES發表X-Pro 1，今年就打孖發布X100S同X20兩部升級版數碼相機。睇名都估到X100S係X100的後繼機，機款無太大變動，但感應器卻換上新一代1,630萬像素APS-C X-Trans CMOSⅡ，兼配新影像處理器，官方稱雜訊可降低三成，而最明顯分別係對焦速度提升好多，官方數字為0.08秒，而快門時滯則是0.01秒。現場試用，無論近或遠，半按快門都即時對到焦，抵讚。

而X20改用2/3吋1,200萬像素的X-Trans CMOSⅡ，配備EXR ProcessorⅡ影像處理器，畫質應比X10佳，另沿用F2.0~2.8 28~112mm鏡頭。光學觀景器上則加入一塊透明數碼面板，可從中睇到光圈、快門、ISO等資料，而且在內置Phase Detection技術下，對焦速度更達0.06秒，勢成數碼「毒」物。兩款新Fujifilm數碼相機將會在二月中推出。

PowerShot N玩Share

Canon今年亦有出手，但估唔到係一部專為Share相片而設的入門機種PowerShot N。它機身非常獨特，四四方方，機背設90度反芒，方便高低角度取景；更特別是快門按鈕同變焦桿都放在鏡頭轉環上。拍攝模式只得兩個，一係就Auto Mode影相，一係玩相機六種特效，玩法一如Instagram，再經機內Wi-Fi即時分享。

Pentax則展出大玩復古的數碼相機MX-1，機身呈八角形，亦不設手握位，外觀還算吸引，不過拎上手輕飄飄，要扣分，預期二月在美國推出，約售US$500。Android相機今年仍有作為，Polaroid會推出首部可換鏡頭的Android DC iM1836，用上1,810萬像素感光元件，配合一支10~30mm F3~5.6鏡頭，概念唔錯，但造工較差；預計價錢為US$399，第一季供貨。

電視大戰陸續有來：Sony、Panasonic首展56吋4K OLED TV

電視一向都係鬥大，好似Ultra HD TV方面，除了Samsung有部110吋可上下升降的Ultra HD TV之外，國產Hisense和TCL都同樣展出110吋Ultra HD TV，不過配套方面仲欠火候，如Hisense只係用Windows畫面做試片；TCL明明宣傳同《Ironman 3》合作，卻冇《Ironman 3》試片。Sony就以全球最大56吋4K OLED TV迎戰，不過不知何年何月才推出，但今年就會在Ultra HD TV上新引進Triluminos技術，可顯示出更鮮艷豐富色彩。Panasonic今年出動機海戰術，展出LED TV同Plasma TV兩大系列，機身外形確係執靚咗，而且亦會跟Sony一樣有56吋4K OLED TV的開發計劃。

Sharp推蛾眼技術

至於Sharp則押注在顯示技術，展示搭載Moth-Eye「蛾眼」技術的70吋AQUOS Ultra HD電視，以納米塗層減低炫光；另亦展出預計2014年方登場的次世代Quattron技術，配合Super Bright技術，可提高亮度兩成至五成。不單如此，Sharp也展出85吋8K電視，由NHK所拍的8K試片確實非常仔細，不過要等實機推出應至少尚有兩、三年時間。睇勻今年CES展覽，兩間韓國電視品牌固然超班，也幸見日本廠商發力追趕，至於國產品牌電視其實不差，展區亦愈來愈大，硬件足夠，只嫌軟件配套遜色，未必吸引到參觀者。