on.cc 東方互動主頁

短遊青衣徑 Nissan Serena Green Highway Star SH

假日想行山，又要唔辛苦，兼有靚景影相，可以去邊？青衣自然徑應該啱晒你要求，一個鐘左右就行完，可遠眺青馬大橋及汀九橋嘅無敵靚景，青嶼風光盡在眼前，況且沿途設有涼亭、長椅及野餐區等完善配套，路面又鋪裝良好、分外易行，好適合一家大細輕鬆Hea番個晏晝。

青馬大橋橫跨馬灣海峽，主橋長度達1.37km，遠觀近望都咁有氣勢，除咗青馬觀景台外，位於寮肚谷附近一帶山丘嘅青衣自然徑，同樣係拍攝大橋嘅靚位。步行徑北面入口於寮肚路盡頭，揸車去可以泊喺長宏邨或長亨邨停車場，起點與停車場相距只有400m左右。青衣自然徑嘅路面鋪裝良好，幾乎完全冇泥路，又有涼亭、長椅可作休息，行山初哥都應付得到。雖然呢條自然徑只有幾公里長，但係沿途都有四個觀景亭，分別對住汀九橋、青馬大橋及青衣市區等景色，唔少拍友都鍾意黃昏前登山拍攝日落景致。跟住指示牌往南面出口方向行，見到青衣西路就係自然徑嘅終點。

加強電動效能

成家出動去郊遊影相，既要載人、又要帶相機腳架，有架MPV的確方便好多，今次借來嘅日產（Nissan）Serena Green Highway Star SH，唔只車廂夠大、夠寬敞，仲非常慳油，皆因導入S-Hybrid系統，增大咗ECO Motor嘅發電能力，而且新增一個27Ah輔助電池（專門供電畀車內12V電器），令Idling Stop嘅時間變得更長、更頻密，達到減低耗油及廢排量嘅環保效果，廠方公布嘅綜合耗油量為15.2km/L（JC08模式），以油價$16.79/L計算，每公里油費約$1.1，環保得嚟又慳家。

體貼One Touch開門

Serena嘅智能停車熄匙系統（ISS），係慳油嘅一大法寶，停車等候時識得自動關閉引擎，若果鬆開制動腳踏，引擎又可以喺0.3秒內重新起動，而且震動輕微，敏捷又順暢。此外，Serena嘅設備亦非常貼心，自動雙電趟門加入One Touch功能，只要用手指輕按門柄上粒掣，就可以控制車門開關，唔使擔心拉手柄時刮花指甲，抱住小朋友都可以輕鬆開門。雖然Serena車身唔細，但勝在車窗夠大，A柱下方又有三角窗，睇位冇難度，又可以加裝頭、尾鏡頭，車前車後仲有幾多位剩，一目了然。現時Serena SH Green Highway Star已經預載埋Keyless Go無匙系統、雙區獨立恒溫冷氣及上斜起動輔助系統，而且獲認可為環保汽油私家車，車價可獲45%首次登記稅寬減。