霸氣爛佬EB 1/4 T-800戰損版
俗語有云︰「好佬怕爛佬」，Figure迷偏偏要愈爛愈好，所以每逢出Battle Damaged版本，往往比正常版仲好賣。本地薑Enterbay當然知道玩家心理，早前就為T-800加入戰損元素，爛面、爛胸、爛腳不特止，仲畀埋隻假手同全Set半金屬武器過你，加埋1/4大比例，愈靡爛愈見功架。
大貨水準 令人放心
玩Figure，首要睇頭雕似唔似。EB呢隻大可放心，頭雕唔似吳嘉龍，面眼亦冇呈八字眉懶憂傷，由大師Scuderia操刀嘅呢款頭雕，輪廓、皺紋都幾可亂真，直視眼神亦捕捉到阿諾喺《T2》時嘅木口木面，最重要係相中實物已經有大貨質素，玩家毋須擔心畀錢後貨不對辦。話明戰損版，當然要爛面先算數，EB就將血肉及機械頭骨分開上色，突出層次感之餘又避免飛油，最正是後尾枕設有機關，一撳之下，右眼即會射出紅光，殺氣騰騰。
武器墜手 製作認真
爛面以外，Body一樣皮開肉綻，呢次嘅素體型號係HD4，由舊有HD1004改良而成，除咗喺心口及左邊菠蘿蓋加入爛肉，仲統一埋全身膚色，以及重整過30個關節嘅鬆緊度，令大Body企得穩之餘，亦擺到大動作甫士。若嫌爛得仲未夠折墮，皮褸及假手應該滿足到「愈爛愈過癮」嘅要求，前者嘅破爛位由人手逐Part打磨及舊化加工；後者就可替換落左前臂上，大玩壯士斷臂Look。武器方面，榴彈炮、子彈及追加嘅火神炮都係半金屬製成，勁墜手，火神炮嘅槍管仲可以360°轉動，唔只得個樣。
查詢︰2332 3615（Enterbay）
EB HD-1013《Terminator T2》T-800 Battle Damaged 零售價︰$2,888
採用改良版HD4素體，足足有18吋高，30個關節嘅鬆緊度亦都重新Set過。
大貨頭雕神似度極高，爛肉位亦甚具質感，玩家們毋須擔心貨不對辦。
後尾枕設有機關，一按之下，就可開啟右眼嘅紅色LED燈。
上身繼續包膠，但為怕甩油，用料就由TPR橡膠變成PVC，仲要留意今次件底衫由黑變灰，跟番戲服。
左臂可換上半截機械手，但舊作隻機械手就插唔番，玩家咪亂試。
M134火神炮嘅槍管係全金屬製成，仲跟埋金屬子彈及黑色手提大袋。
M79榴彈炮以金屬及木材合製而成，當然跟埋榴彈同肩帶啦！
左膝有爛肉，金屬位仲係分開上色，避免飛油。
皮褲同Boot都經過舊化處理，但係望落仲係太新淨，重手啲更好。
隨盒附有四對造型手掌，以及1/4專用地台。