忌廉照尖東

想當年，明月照尖東；今時今日，係忌廉照尖東就真！多得英國短毛肥貓尖東忌廉哥的一輪發功，帶旺番沉寂一時的尖東，連佢自己都貓氣急升，由報紙檔貓店長，升格為廣告男模，仲要連書都出埋。別以為忌廉哥每日只懂食瞓屙，過去橫跨新年嘅一星期，其實忙到冇時停，除了要為寵物巴士啟航做嘉賓，又要陪粉絲倒數，呢幾日又要籌備今日舉行嘅新書《我係尖東忌廉哥》蓋印會，忙到23吋肥腰幾乎失守！各位忌廉迷朝聖唔想撲空，就要記住忌廉哥每日作息時段。

據忌廉哥主人高先生透露，每朝早上7至9時，係忌廉哥嘅晨運時段，露面機會率最高，佢同忌廉嫂會出來舒展筋骨曬太陽。午飯過後2至6時，係忌廉嘅午睡時間，不會露面。晚上7至10時，忌廉出巡嘅機會都頗高，不過高先生表示，除非是長者粉絲到訪，否則不會擾貓清夢！忌廉哥有時亦非常「識做」，聽見鐵粉高呼「忌廉仔」，都會起床露面一陣。在剛過去嘅除夕夜，忌廉哥睡至23：55，準時現身倒數，令粉絲興奮莫名。已有另一半嘅忌廉哥，閒時喜歡同摺耳黑白肥貓忌廉嫂耍花槍，出現摩擦，源於老婆鍾意搶鏡；高先生澄清，忌廉哥都算係一位Gentleman，貓糧龍床被老婆侵佔都冇投訴。今日忌廉哥又再出城，為新書舉行蓋印會，各位愛貓之人請放心，忌廉哥肉手不會被油墨沾污，因為高先生一早已用Scanner掃描了貓掌製成蓋章，屆時忌廉哥只露面監督蓋印過程，當然，又可以同班鐵粉會一會啦！

尖東忌廉哥檔案

七歲多英短肥貓，又名忌廉、BB，體重17磅，腰圍23吋，自鎮守尖東信和士多後成為區內著名貓店長，去年夏天失蹤26天尋回後貓氣火速急升，facebook專頁粉絲人數已超過6萬人，一張肉照贏得數千Like。專訪廣見於各大報章雜誌，近期更成為電視廣告主角，最新搞作是出書《我係尖東忌廉哥》，是忌廉哥的食玩瞓Chok全紀錄。