誠意打造 禮品吃進肚

佳節例必要送禮，太求其會被人嫌棄冇誠意，最好是為收禮者度身訂造的才夠心思，唉！自問實在忙，哪來時間為各位姊妹DIY呢？Why Not！不少特色小店專門提供自訂美食禮品服務，無論你朋友幾奄尖，口味多刁鑽都滿足得到。要Custom-Made好味道小禮品，Easy！

ChocoYOU 2.7億款朱古力Bar

新近開設的網上朱古力小店ChocoYOU夠晒創意，如沒選擇困難症的話，花幾分鐘就能為黑、白、牛奶三款朱古力加上配料自訂出心儀味道，否則便得在2.7億款組合中作出滋味抉擇！不是吧？

「3款比利時朱古力，近300款材料和口味選擇，用數字來推算，確實有2.7億個組合，要一日食一款，都要7千年至試得完，哈……」老闆Alexis笑說。Alexis本為傳媒人，先後任職過Sony Music及Channel V，創意諗頭不用置疑，只是，開設朱古力店又真的有點風馬牛不相及吧！「我本身好鍾意食朱古力，以前成日在屋企整朱古力，送予朋友分享，Feedback都幾好！」由於本身是朱古力迷，發現坊間鮮見個性特色朱古力店，經朋友鼓勵後，便開設能炮製帶有東南亞口味朱古力的ChocoYou。

何解偏偏是東南亞口味？「我們從小會吃很多零食，例如山楂餅、陳皮、話梅、雞汁麵咁，又鍾意食咖喱、麻辣火鍋，又會食很多蔬果，榴槤咁，這些口味都融入ChocoYOU朱古力裏。」當然，果仁、乾果等配料還是有的，不少更是Alexis試吃過才入貨，像法國冰乾紫羅蘭、玫瑰花、薄荷葉；伊朗開心果；美國杏仁、核桃、腰果；意大利榛子；日本芥末青豆；中國南瓜籽、花椒、杞子；泰國榴槤乾、杧果乾等，獨特奇怪兼而有之，且能與黑朱古力的甘或牛奶朱古力的甜取得平衡，反高潮地吃罷竟有強烈Aftertaste呢！

未食先興奮

所有自訂朱古力均是收到訂單後才製作，先將比利時朱古力煮溶至40℃左右，此時可加入要求的口味，如咖喱、五香、八角、生薑等，然後將朱古力急速降溫，經過調溫後，即可加入如冰乾士多啤梨、榴槤乾、陳皮、杞子、雞汁麵等配料，冷卻後以禮盒盛載並按客人要求命名，一盒度身訂造的朱古力便大功告成，還送到收禮人府上，叫人多麼的驚喜與甜蜜！

花多少少心思，還可以按要求將相片放上朱古力處，一看就心甜！小店連一塊朱古力Bar都接受自訂，惟送貨費用另計，加Logo則要訂超過25塊起，價錢另議，一般約3個工作天起貨，大量訂購或節日則要起碼一至兩星期，ChocoYOU雖在試業階段，但聽聞已有不少大訂單。

Shop Info

ChocoYOU

網址：www.chocoyou.com

Royal Cake 好夠「照」蛋糕曲奇

看到肥嘟嘟的BB、笑到甜一甜的新人，恨不得想一啖吞落肚，殘忍？暴戾？說的是由Royal Cake製作的相片蛋糕，可以將相片印製成食得落肚的食材，放在Cupcake、朱古力棒棒糖等，收禮人同樣驚喜萬分。

Royal Cake既開設整餅課程，同時會替客人訂製照片Cupcake、照片曲奇，甚至立體造型的朱古力棒棒糖。只須預備自選照片一張，餅店就會用經獨家由美國FDA（食品藥物管制局）核准的食用墨水及食用紙等印製能吃得下肚的照片，還可以印製Logo、結婚照等，最重要是，價錢相宜，相片Cupcake一個才$45、相片曲奇也不過$200-$250四塊，那份獨家打造的心思定能令對方笑逐顏開。訂單製作一般需時一個星期，揀一揀相、上一上網、Click一Click，玩一輪又畀到驚喜人，好玩！

Shop Info

Royal Cake

地址：旺角彌敦道585號富時中心604室

電話：2381 9221（7:00pm-11:00pm）

MY WINE 你的名字我的酒標

自餐酒免稅後，美酒送禮自用皆便宜，如果加上你的名字或我的姓氏作酒標，成為全球最Unique兼有紀念性的餐酒，不用飲，單是想像一下，也浪漫醉人！

店名MY WINE即Make Your Wine，顧名思義可提供自家釀製個人餐酒服務。大家可以訂購一支甚或大批餐酒，加上自訂酒標作禮物。採訪當日就見到董事之一的Ephraim為母校訂製的餐酒，還有以可愛BB相或自畫題字、圖畫製成酒標作為滿月或周年紀念飲宴回禮餐酒之用。

想更有個人風格？連酒也可自己釀，MY WINE亦教授葡萄酒DIY，提供源自歐美的Merlot、Chardonnay、Amarone、Shiraz等逾40款紅、白酒、果汁酒及冰酒等原料，經釀酒師教授，可按個人口味調整單寧、口感、橡木香氣、果香等等，經過濾及發酵後釀成指定餐酒，再自行入樽、貼酒標籤及封瓶，釀製一桶需3千多元，一桶可做750ml標準裝餐酒30支；一桶冰酒或果汁酒的話，則可做375ml酒30支。

Shop Info

MY WINE

地址：觀塘鴻圖道6-8號樂居工業大廈4樓

電話：9723 3239